bo logh

Hoghvam mu'

2011-10-01T10:48:00.000-07:00

wa' mu' qel 'ej vuDmey ja' je. tlhIbHa' QIchDaj. vI'IjtaH 'e' vIHech.

nuq bop bom

2011-09-18T18:43:00.001-07:00

nuq bop bom lut vIqonlI'bogh DalaDlaH.

vajar Duj

2011-09-08T17:18:00.000-07:00

lut vIqonlI'mo' Dujvam vIcha' vIneH. loQ lut peghHa'moH pu'jInvam 'a DacherghlaH 'e vIHar.

-chugh 'oSlaH DIvI' Hol ra'meH wot

2011-02-07T12:02:00.000-08:00

tlhIngan Hol DajatlhtaHvIS, vay' DabuQchugh bIjatlh «Daruchbe'chugh vaj bIHegh». DIvI' HolvaD pabvetlh lo'laH vay' 'ach motlh ra'meH pab rurbogh wot lo'lu'. «yIruch» net jatlh «pagh bIHegh». tlhIngan Hol jatlhlu`taHvIS Qapbe`mu`tlheghvetlh à DivI`HolvaD motlh. QapmeH tlhaQwI'vam, taghnIS mu'mey motlh, ghIq rInnIS latlh mu'mey motlh. rarHa'mo' cha' mu'tlhegh motlh, tlhaQ.

YouTube tlhIngan Hol

2010-11-14T13:46:00.000-08:00

tlhIbHa'.

r'Hul ghor Duj

2010-11-02T15:06:00.000-07:00

Boing Boing vIlaDtaHvIS ghor Duj per vIlegh 'ej vIghov 'e' vIHar. Dujvetlh chIj r'Hul 'e' vIHar. nagh beQvam SeH Creative Commons. motlh ghor Duj per qonDI' Hoqra', per nop nagh beQ, 'ach 'ang nagh beQvam. lo' laH Hoch. bepbe'bej r'Hul vaj potlhbe' 'a Daj.

pIqaD lo'be'

2010-10-12T21:33:00.000-07:00

DaHjaj iPadwIjvaD pIqaD lo'bogh pat vInejtaH 'a wej wa' vIlo'laHbogh vISam. nuq vISam? Dochvam.

nuq boghel?

2010-10-11T16:19:00.000-07:00

mevpu'DI' Hov leng much, nughvaD Sab tlhIngan Hol 'e' vIpIH 'a qaSpu'be'. vay' yap ngI'law'mo' Hol, taH.

yu'egh yIlIgh!

pong chut

2010-10-07T10:47:00.000-07:00

pIj De'wI' tetlhvaD pong ghItlhnIS vay'. 'a pong lo'bogh nuv laj'a' De'wI'? rut. De'wI' ghunmeH, pong motlh Delpu' ghunwI' 'ej roD Hoch pong ma'laHbe'. ghu'vam Del ghItlhHomvam.

jang wa' nuv, <wa' pong ghajbej Hoch nuv 'ej *passport*DajDaq tu'lu'!> mujbej nuvvetlh. *passport*wIj'e' DalaDchugh, pong Dalegh. pongvetlh vIlo' 'a pongwIj mub 'oHbe'. teblaw'wIjDaq loS pong mub vIghaj. wa'maH ben wa' vIlo' 'e' vImev 'ej latlh wej'e' not vIlo'ta'. rut lo' latlhpu' 'ej vIlaj.

chut cha'maH chorghvaD chovnatlh vIlegh vIneH.

ghobe' SuD

2010-09-30T12:58:00.000-07:00

qatlh tlhIngan 'ampaSDaq HaDbe'taH 'arabngan ghojwI'pu'?

Qo'noSDaq tenHa'DI' chaH, yu' tlhIngan Hung 'ej tlhob "qatlh yuQvam DaghoS?"

"jIHaD" jangDI' SuchwI', qoplu'.

(*DIr 'In HeH qIplu' net Qoy*)

maq'egh

2010-08-25T18:33:00.000-07:00

DaHjaj lut maq qoj De' 'ang neHchugh vay' Qonosvam rurbogh QonoS'e' lo'laH. nap. 'a wejmaH ben De' ghomHa'meH vay' maqmeH malja' lo'nIS. 'ej Soviet UnionDaq qum 'oH malja'qoqvetlh'e', 'ej vuD naDbe'chugh qum, vuD maqbe'bej. vuDmey 'angmeH nuv, navmey lo' 'ej navmey ghomHa' ghaH. самиздат (Sam-Iy-S-Dat) ponglu'.

ta' ghaH'e' 'oH cам-. rut -'egh rur 'a naDev ta' qonwI' 'oS.

nuq ta'? издат. maq. navDaq De' ghItlh 'ej nuvvaD nav nob.

'ach DaHjaj mIwvam DelmeH DIvI Hol jatlhbogh nuv, semizdata ghItlh. vIparHa'qu'! DivI' Hol vIpojchugh cha' 'aymey lutu'lu':

bID 'oS semi. vay vI semita'chugh vIta'chu'be'. loQ vIta' pagh vIta'Ha'.

(pagh 'oS z 'ach bIDmey rur semiz)

De' 'oS data.

vaj semizdata qullu'DI' De' maq vay' 'oS, 'ach maqchu'be'. jIHvaD Daj.

batlh'etlh lo' HejwI'

2010-07-13T21:25:00.000-07:00

Colorado SpringsDaq cha' Suy Hej batlh'etlh yanbogh loD. tlhIngan 'etlh lungu' lut qonwI' 'ej pongDaj'e' luQullaw'ta'. 'etlhvam mach law' batlh'etlh motlh mach puS.

Batleth 'oH ja' Fox News. Denver News DalaDchugh, vaj bat'leth 'oH.

Qapla' batlh je

2008-02-08T21:59:00.001-08:00

Colbert ReportvaD DIr qIj ghajbogh nuv quvmoHmeH Stephen Colbert wo'rIv ngu'. chavmeyDaj maq 'ej naD. lut rInmoHmeH, tay'taHvIS jatlh bejwI'pu'Daj. jatlh Qapla' batlh je. 'ej qar! pupbe' QIch, tlh jatlhDI', 'a qarmo' pab jIyay'.

majQa', Colbert.

qum wIv

2007-12-29T09:25:00.000-08:00

DevwI' moj neH ghaH 'ej loQ tlhIngan rur pongDaj, qID much John Stuart.

QeD QonoSmey

2007-12-12T22:42:00.000-08:00

QeD QonoSmey qelmo' loDvam QonoSDajvaD bologh vIrar 'e' vI'omlaHbe'. Do'Ha' QeD bopbogh QonoS DaH 'oHbe'taH bologh'e'. chaq DaHjaj wanI' le'vamvaD QeD vIqel.

yagh jaj HaD Coturnix. nom QeD vIlIngmeH loDnalwI'vaD QeD ngoD vIpoQ. Qap ghaH. jatlh: cha'maH ben nuv HaD QeD. Qorwagh Hutlhchu'bogh pa'meyDaq Humanpu' wegh. jajchaj cher 'e' chaw'. Qong, vem, Sop chaH. poH wIvlaHchu'. tlhaq Hutlh vaj porgh tlhaq neH lo'laH. qaSpu'DI' cha' Hogh, cha'maH vagh tera' rep taH wa' jajqoq.

Huj'a'? cha'maH loS rep taH tera' jaj teH.

ngongvetlh 'ol vay' 'e' vISovbe'. chaq teHbe' lut 'ej not qas ngong. DaH tlhaq Dech QonoSmey yISuch, maSaH 'e' SovmeH Coturnix.

De'wI'wIjvaD

2007-12-09T17:53:00.000-08:00

chaq De'wI'wIjvaD leQmeyvam vIghajchugh pIqaD vIlo' 'e' vIghojqangchoH.

tlhIngan Hol lut

2007-11-30T20:56:00.000-08:00

tlhIngan Hol, tlhingan Holqoq je lo'bogh muchmey Sar qel Toby. nughmaj DuQchu'ta' Holvam. chaq Navajo jatlhchu'wI' law' law' tlhIngan Hol jatlhchu'wI' law' puS, 'ach wa' mu' Sovbogh nuvpu' DIqelchugh, 'omlaHbej tlhIngan Hol.

tetlhvam boSta'mo' Toby vItlho'.

MinnesotaDaq jIHlaHbe'mo' jI'IQ

2007-11-29T21:24:00.000-08:00

MinnesotaDaq muchvam le' vIlegh vIneH 'a Do'Ha' pa' jIHbe'.

qeSqu'

2007-10-02T20:58:00.000-07:00

DaHjaj qeSvam vItu'. tlhIngan Hol HaDmeH pat vIchupbe'. qaStaHvIS rep Delbogh QongnIS HaDwI'.

jech chenmoHwI'

2007-06-19T06:27:00.001-07:00

ParamountDaq jech chenmoHwI' lutu'lu' 'e' wISov 'a juHqo'Daq tu'nISlu''a'? chaq SutDaj'a' chenmoH Hoch tlhIngan. chaq patlh 'oS Sut Sar.

jIHvaD HaghmoHwI'vam 'ang Books & Coffee.

QIjlaH'a' vay'?

2007-06-06T21:39:00.000-07:00

vIyajchu'be' 'a nuqawlaw'taH Penny Arcade qonwI'.

tlhIngan Holqoq

2007-02-17T15:29:00.000-08:00

DaHjaj ghojmoHwI'qoqvam lut vItu'. 'emDajDaq tlhIngan Hol leghlu' 'a Dap leghlu' je. tlhIngan Hol jatlhchoHlaw' 'ach Dap moj. vIpoj 'e' vInID.

Kling-gon jatlhqa'taH: vIQIj vIneHchugh chaq lughmoHchu'ghach vIpIch. DIvI' Hol jatlhchu' neHchugh tlhIngan Hol jatlhwI', vaj DIvI' Hol wabmey lo'nISchu'. gvetlh ghajbe'mo' tlhIngan Hol chaq lo'Ha' be'. taQ. tlhIngan Hol vaq luneHchugh qonwI'pu' qatlh tlhIngan ja'laHbe'?

nuHmeyvetlh, nuHvetlh, yuQvetlh, bIjatlhHa'chuq vIlegh. bIjatlhHa'chuq? jatlhHa'bej.

maj ba HaSta' Dach

L'TA DOS P'KA BA D'RA

HIja' nuq maj nama

yIqar raq a par Danaq

HIja' maj jIya qo

taQ. jIHaDnISmo' vIpojlaHchu'be'.

Hatlaw' bat'etlh

2007-02-15T22:15:00.000-08:00

GloucesterDaq Hatlaw tlhIngan bat'etlh. nuv juHDaq bat'etlh jej lujon yaSpu'. nach SevlaHbej betlhleH yanbogh SuvwI' 'a pagh HIvchugh HattaH? jum.

yatlh tlhIngan--jIHbe' ghaH!

2007-02-10T23:57:00.000-08:00

yatlhmo' be'vam 'ej 'oy' SIQvIpmo' jInmolHom ta'. not tlhIngan be' much Hov leng maq vavDaj. lughbe' qechvetlh 'e' tob be' yatlh.

tugh bogh ghuDaj.

nuqjatlh?

2007-02-01T14:10:00.000-08:00

DaHjaj nagh beQ vISam vIneHmo' Google vIlo'. Hoch jaj Google vIlo' 'ej qapchu'. tlhoS jIH vIbejnISbe'. DoSwIj Delbogh mu'mey vIghItlh 'ej leQ vIchu'. SIbI' nargh Daqmey vIneHbogh. 'a DaHjaj vIleghDI' vInuDqa'bej! chay'?! ghaytan reH SaH. motlh leQmey vIlaDbe'law'. vI'uy neH.

Dalegh'a'? DaH vIleghpu'mo' vIleghtaH 'ej leghbe'taHghachwIj vIQIjlaHbe' 'a qaStaHvIS jarmey DISmey joq vIleghbe'taHmo' Sa'ang.

ghorgh qonlu''a'? qID'a' qonwI'? ngaghwI' nejbej nagh beQ nejwI' law', 'ej nepbe' tlhIngan Hol jatlhwI' 'ach DaHjaj bat tel cha'bogh Daq vInej, lung'a' vIghItlh 'e' vInIDmo'. (-mo' lo'bogh mutlhegh'e' numDI' mu'tlhegh pIn, reH charghwI' vIqaw. Qapla' charghwI'!)

mu'vetlh lISnISlu'ba'. SeH 'Iv?

poH SuchmeH jan

2007-01-18T14:50:00.000-08:00

qaStaHvIS poH law' naDev jIghItlhbe'taH 'a rut yajlaHbe'taHvIS HochHom jIQIj'eghnIS.

lutHomvam vIlegh. poH SuchlI' Hoch Duj 'e' vISov 'ej potlhtaH leng, 'a rut vIlIj.

DaHjaj poH vISuchbe'. jIba' neH 'ej muSuch poH.

latlh nov Hol

2006-07-15T07:05:00.000-07:00

bong QonoSvam vItu'. qech vItIv 'a vIyajchu'be' 'e' vIchIDnIS.

QonoS vItu'pu'bogh Dal law' Hoch QonoS Dal puS

2006-02-13T06:53:00.000-08:00

DaHjaj bong <QonoS veb> leQ vI'uy 'ej QonoSvam vItu'. Dalqu'mo' *spam* 'oH 'e' vIHarchoH. Doch ngevbogh vInejlI' 'ach pagh ngev. yInvetlh Dalqu' Del neH vay'. vIvaq vIneHbe'. 'a vIvaq.

pongmeH mI' Dayaj'a'?

'ovwI'

2006-01-14T19:40:00.000-08:00

ghunwI' ghaH loDnalwI''e' 'ej De' cha'bogh mIwmey buS. DaHjaj tlhIngan Hol cha'laH 'ovwIDaj maq. toblaH'a' vay'?

Hut wa' wa'

2006-01-13T17:41:00.000-08:00

vagh ben cha' qach potlh mup cha' muD Doch 'ej Dejchu' qachmey. ngoDmeyvetlh Sov Hoch.

DaHjaj lotvetlh pojbogh Daq vIlaD. bong vItu'. De' vInejbogh vIqawbe'.

not qulmo' Dejpu' qach jatlh pojwI'. vIt vIwIvbe' jIH 'a qum lut Duy'mey boSbogh QIjqa'wI'pu' vItIv. QaghHomHeymeyvam bagh 'ej lut chu' 'ang. mIwvam vIlaD 'e' vItIv.

Horror filmmey vIbejbe' jIH 'a DaHjaj Friday the 13th bejwI' bel vIyajlaH. qoS lut vItIvqu'. «maSDaq maSaqbe'» «DebDaq Saqta' novpu'» «JFK chot qum».

Santa Quv

2005-12-13T12:30:00.000-08:00

nuqDaq Dab Santa Claus? puq jIHtaHvIS qanaDa Dab reH 'e' vIHar. vIQummeH Quvvam vISov:

Santa Claus, North Pole, Canada, H0H 0H0

tera' Sepvetlh wav puH Sar vaj DaqDaj ngu'laH Quv Sar 'e vISov. vaj jIQul.

Santa, Reindeerland, UK, SAN TA1

Santa Claus House, 101 St. Nicholas Drive, North Pole, AK 99705

Joulupukki, Santa Village, FIN-96930 NAPAPIIRI

SANTA BOSSE PERSSON, Box 4403, S-203 15 MALMOE, SWEDEN

AustraliaDaq SAnta Quv vISambe'mo' jIbel.

joSmey

2005-07-28T20:16:00.000-07:00

DaHjaj ne'vaD jatlh vu'wI'wI' "rI'chugh *media* SIbI' jIHvaD tIjatlhmoH"

ra' 'e' Qoy' cha' 'orwI' 'e' jIHvaD ja'. "qaS nuq?" tlhob chaH.

"DaHjaj muDpIn jIHmo' qaSchugh vay' jISovchoH" jIjatlh. jISovchoH.

DaHjaj po vengwIjvo' tlheD muD Duj 'a not ghochDaq paw. 'or cha' nuv 'ej wa' vISov. loSwen majatlhtaHvIS jIHvaD jatlh ghaH "tugh Duj tIn DIchIj Hoch." wejwen 'ebvetlh jon ghaH 'ej Quchqu'. 'ebvetlh baj 'ej val ghaH. Hoj.

'ach DaHjaj pawbe'.

nejlu'lI'. wej Duj Samlu'. Sotlaw' Hevlu'be'. jav vatlh qelI'qam chuq 'oS Duj He. Duj SoplaHpu' bIQ'a', HuDmey, chuch joq. nachwIjDaq jupwI' vIlegh 'e vInID. QIHlu'bej Duj 'ej Qapbe' QumwI' 'a chuchDaq ba' ghaH, mInDu'Daq botjanHommey chong tu'lu'. nejwI'pu' loS.

DaH, jIghItlhtaHvIS, HurghlI' Hur. qaStaHvIS Hut rep nejlu'lI'. jItullI' vIneHchugh nachwIjDaq ghaH vIchoH.

vIpong vIneH 'a jIQIpmo' DaHjaj QonoSwIj cha'DIchvaD bong jIngu'Ha''egh vaj jItamnIS.

pI'qu'

2005-07-05T16:06:00.000-07:00

DujHom'e' lo'laH yItlaHbe'bogh qanwI' Del QonoS. DujHom Seghvetlh vISov 'ach latlh Segh Del je QonoS. Bariatric DujHom Del. not mu' bariatric vIQoypu'. 'ogh 'a qonwI'? ghobe'. DIS wa' SanID Hut vatlh SochmaH Soch mu' cherlu'law'. pI'qu' 'oS.

pImtaH

2005-07-04T09:38:00.000-07:00

qen yuch vIje'. FinnlandDaq chenlu'moH. ngSwI'Daq yuch Del wa'maH cha' Hol. pIrmuSDaq mI' ghItlhlu'. pa' jav mI'mey tu'lu' 'ej mI' bIngDaq DDMMYY ghItlhlu'. wa' Hol lo'. qaStaHvIS tup jImIS. qatlh wa' HolvaD neH pat qIjnISlu'? 'a vIyaj. 'amer'I'qannganvaD neH qIjnISlu'. jaj-jar-DIS pIH Hoch. nIteb patvetlh lajHa' 'amer'I'qanngan. Daj.

toH DaHjaj lop chaH. 070405 yIlopchu'. SaHoy.

yab qoplu'

2005-06-20T12:27:00.000-07:00

chotmey ghaj nugh. chot ghajchugh Qu' tuchchugh chot vaj muj Qu' 'e' Har nugh qoj mujchoHghach SeHmeH nugh Qu' SeHnIS.

ghor Duj chIjtaHvIS vay' Hat Do tIn. mujbe' Do tIn'e' 'a Do tInmo' chaq Duj SeHlaHchu'be' chIjwI' 'ej vay' QIH. SeHlaHchu'be'ghachvetlh botmeH, Hat Do tIn. qechvam vIyaj 'a rut mujotHa'moH.

chotDI' vay' HatnIS. vay' QIHchugh vay' HatnIS. vay' QIH. 'e' nIDDI' vay' HatnIS je. pagh DaQIH 'e' DanIDchugh, 'a vay' QIHlaHbej Qu' QIp DanIDchugh, HatnIS. HochHom chutmey Del qechmeyvam. rut QIH'e' lajlu'chu' 'a QIH HupmeH pagh QIH botmeH chut chenlu'.

vay' QIHlaH Hoch. vaj HeH Huv ghItlhnISlu'.

QubDI' neH vay' not Hat vIneH, 'a Dachchu'be' thoughtcrime Delpu'bogh George Orwell. lalDanmey Qat paQDI'norgh yIQel:

jIllI' be'nal yIneHQo'

lalDanvetlh DaHarchugh, vaj juHlIjDaq Daba'taHvIS, jIllI' be'nal DaqelDI' bIyem. pagh Data'nIS. bIQubDI', bIyem. muSuj chutvam. yabDaq tlhab nuv 'e' vIHar.

wej

2005-06-07T22:35:00.000-07:00

vIran'eS Hol HaDlI' loDnalwI'. DaHjaj 'uQ luSop ghaH, latlh ghojwI'pu', ghojmoHwI' je. vItlhej 'e' luchaw'. majatlhtaHvIS mot pas encore jatlh ghojmoHwI' 'a yajbe' loDnalwI'. jIQIjmeH wa' mu' vIjatlh: wej. mu'vetlh yaj loDnalwI', vaj yaj.

jImaw'ba'

2005-06-04T21:44:00.000-07:00

SochHu' puq vIghItlh vIneHDI' vaghlogh puH vIlo', 'ej mISDI' vay' QaghwIj vIghovbe'. jIQubtaHvIS nachwIjDaq neH mu'mey vIjatlh 'ej nachwIjDaq nIb puH puq je.

DaH jabbI'IDvamDaq Qagh'a' vIngu' 'e' vInID.

puq poH per

2005-05-29T23:33:00.000-07:00

nuvmey Dellu'meH rut puq poH perlu'. ghaytan Generation X boghov. DaHjaj puq poH per Del raQpo'wI'. puq poH ringtone chaH. pup.

Holvam yIngu'

2005-05-18T09:14:00.000-07:00

puSHu' rInlI'mo' <Hov leng> muyu' vay' 'ej mu'meywIj lI' chaDvay AM690. wa'Hu' chaDvayvetlh vI'IjtaHvIS qaD lumuch. Hoghvam De' qawnIS 'IjwI'pu'. Qangma' mu'mey much ghIq jatlh <ghorgh ghaH jatlhtaHvIS?> Sa' mu'mey much ghIq jatlh <'Iv ghaH jatlhwI''e'?>

pay' jatlh <Holvam yIngu'> 'ej jIH'e' vIQoy. loyHa' jeSwI'. Innuit vIjatlh 'e' loy.

Sabbej HolwIj. <rIn> lIw nIv tu'lu'bej 'e' vISov 'a vIqawbe'. chaq DIvI' Hol vItamnISchoH.

Dat

2005-05-13T23:54:00.000-07:00

muHaghmoH BlogPulse. cha' tlhIngan Hol qelbogh Dochmey tu'pu' 'e' luHar 'a wa' tlhIngan Hol jatlhwI' luqel. jIH.

2005-05-12T09:24:00.000-07:00

tIq bey vInuDlI'. pa' SoS vav je Hutlhbogh puq qab lucha'lu'. puq vISuq vIneHbe' 'a muvuQ Daq. muvuQ pongmey'e'. qIj HochHom puq DIr 'ej tIghvetlhvaD jaS puq ponglu'law'. qubHa' mu' 'ay'mey aa, ya, la, sh, qu, ynna. rurbogh pong vIchenmoH 'e' vItIv. pongmeychaj vIvaqbe', 'a DIv bel. yInID. wa' rurbogh pong yIchenmoH, 'ej yIgoogle. ghaytan DaSam. 'a wej Keshynna vISam. ghaytan Keshynna tu'lu' 'a wej noy'.

tIgh pongmey HaDlu'ta'. qen QulwI' mu' vIlaD. ghojmoHwI' luSIgh 'e Har Figlio. naDev mu'meyDaj tu'lu'.

vaj jIH neH muvuQbe pongmeyvam Daj.

tuqIHpu''a'?

2005-05-03T22:12:00.000-07:00

tuqIHpu' 'e' vISov vIneHmo' Satlhob 'ej tujang. wIvmeyHeyraj vI'ang.

Qov DaqIHpu''a'?

wIvmey

HIja' - ghaH vIqIHbejpu'

15%

chaq vIqIHpu'. Hujbogh nuv law' vIqIH. chay' wa' vIqawlaH?

De'wI'mo' vISov, 'a not mulegh ghaH.

'Iv ghaH Qov'e'?

Huh???

73%

60 wIvmey

DaH wIv chu' vI'oghnIS.

Condomize

2005-04-30T09:19:00.000-07:00

AIDS rop botmeH Dup 'ogh boQpu'. mu' chu' 'oghlu'pu': condomize. puHwIjDaq mu'vetlh wIlo'be' 'a vIghovlaH 'ej vIyajlaH. 'alatlh puHmeyDaq jaS yajlaH vay'. PhilippinesDaq juH Segh qellaw' mu'.

Heghlaw'pu'

2005-04-29T15:17:00.000-07:00

muyu'ta'DI' lutvam qon Vancouver Courier. Dayu'lu'pu'chugh mu'meyvetlh vIjatlhbe'ta' 'e' DaSov, 'a Daj lut. pItlh ghItlhHa'ba' je 'a mutuchbe', vaj SaH 'Iv.

Heghpu' rIntaH 'e' boHar'a'?

loj Hov leng

2005-04-22T08:06:00.000-07:00

rInmo' Hov leng much QavDIch vIyu'lu'qa'. munuQbe' 'a povam qabwIj luqon yu'wI'pu' luneH. jech vItuQ luneH. tlhIngan vI'oS luneH. wejpuH. chaHvaD jIQIj: Qo'. paqmey vIcha'qang. jupwI'vaD jech vItuQqang. mIpHa'wI'vaD Huch wInobmeH jech vItuQqang. 'a QonoSmey bongevmeH jech vItuQbe'. vuDwIj boSov boneH jIjatlh, 'a tlhIHvaD jech vItuQQo'. jIpuQ.

DaH qonwI' vIloStaHvIS jIqeH'egh. jIjIj 'a munuQ. qatlh muqon 'e' vIchaw'? paSchugh jImej. juHwIjDaq 'el 'e' vIcahw'be'. lotlhwI'Hom jIH.

latlh Hov leng much ngev Paramount wa'logh 'e' nIDqa' 'e' vIpIH jIjatlh. 'a HeghbejlI' 'ej jISaHbe'. SaHlaw' pagh. SaHbogh nuv SamlaHbe'law' yu'wI'.

chay' choSam, jIjatlh.

jIgooglequ', jatlh.

vengwIjDaq tlhIngan, Hov leng ghap De' Sov neHchugh vay', munejlaw'.

DaH paS qonwI' 'e' vItul.

mughqa'ghach

2005-04-10T22:33:00.000-07:00

mu'tlhegh mughchugh vay' 'ej ghIq mughqa'chugh vay', Dap mojlaH. wanI'vamvaD ghongHey cherta' Carl Tashien. may'be' chovnatlhmey muchbogh Tashien: DIvI' Hol qIDmey bIH.

chuvmey chutmey

2005-04-03T09:25:00.000-07:00

tlhIngan HolvaD potlh chuvmey Daq. lanHa'chugh DapchoHlaH mu'tlhegh. wot numnIS chuvmey Segh puS. DIvI' Hol pIm chut 'a chutqoq lumaq 'e' lunID Strunk White je. vuDchaj luyajmeH Geoffrey K. Pullum, Mark Lieberman je ghItlhmey Qul. vatlh ben vIHchoHlaw' DIvI' Hol chuvmey. lutobbejta'be' 'a Dajmo' DuH. vImuch.

cha' Hol jatlhchugh vay'

2005-04-02T00:27:00.000-08:00

qanaDaDaq cha' Hol jatlhlu'. qumvaD toy'chugh vay', Hol cha'DIch jatlhnIS. not Holmey pong qanaDangan, «cha' Hol» neH jatlhlu'. DIvI' Hol, vIran'eS Hol je jatlhnISlu'. jatlhlaHbe'chugh vaj ghojmeH DIlqang qum.

qechvam vaq muchvam. cha' ben cha'lu' 'a DaHjaj neH De'wI'Daq vIlan 'e' wISovchoH. tlhIngan Holna' jatlhbe' ghetwI' 'a Doj HolqoqDaj.

naDevvo' wa'logh neH yIlabmoH. De' law' wIlI'be'nIS.

muHmeH mIwmey

2005-03-28T16:21:00.000-08:00

DaHjaj yInqa' muHlu'pu'bogh loD 'e' Har wa' lalDan HarwI'pu'. ghaH muHmeH, cha' Sor Hap 'aymey Daq HuSlu'. ghopDu'Daq qamDu'Daq je DuQ baS. jatlhDI' <jI'oj>, qIDmeH negh, pey nob. DaHjaj lalDanvetlh 'oS cha' Sor Hap 'aymey HeDonHa' rurwI'.

muHmeH mIwmey Sar lutu'lu'.

qama'Daq naghmey vo' roghvaH

Hughvo' qama' HuS

qama' 'aDDu'Daq tar lanlu'

pa'HomDaq SIp SuQ tlhuH qama'

quSDaq ba'taHvIS qama' HoH 'ul

qama' bach negh

nagh teq. DuH 'etlh jonta' ghap

nuQ vIlIjpu'? cha'vatlh nem lalDan chu' 'oS'a' 'ul quS?

cha' Doch vIqel 'ej jIloStaH

2005-03-22T12:41:00.000-08:00

QItmo' blogger cha' Doch vIDuD.

ghop Hol veng

South DakotaDaq QoylaHbe'wI'pu'vaD veng naQ cherlI' Nederveld Associates. QoylaHbe'wI'pu' ma'laH Hoch veng. DuH, 'ej Qatlhbe' 'a ma'qangbe'law'.

HIQaH

jImoghmo' GoogleDaq "help" vIghItlh. Mental Help Net 'oH DoS wa'DIch'e'. maj. GooglevaD Sotlaw' jatlhchugh vay' jangnIS vay'. ghaytan chIch luruQ Googlengan.

wej Dejlaw' yabwIj 'a jIHvaD Daj tetlhvam.

qaStaHviS wa'maH cha' DIS QullI' tej 'ej Sabqu'be'law' Qubbogh nuv net Har. pIvtaH yabwIj vIneHqu'mo' DaH jIba' 'e' vImev.

QapchoHpu'DI' blogger jay'. QonoSHomvam naQ vIQulta' 'ej vIqonta', latlh lutmey vIlaDtaHvIS je 'ej wej blogger SeHlaw vIma'laH. chImtaH SeHlaw Daq. DaH vIpoHchoH ... 11:55 ... jISay''eghmoH ... 12:07 ... jIQaD'eghmoH 'ej jItuQ'eghmoH ... 12:11 ... Sut Say' vIbeQmoH 'ej paSlogh chang'eng vISam ... 12:19 ... Sut DaqmeyDaq Sut Say' vIlan ... 12:27 ... ghogh HablI'mo' ghojwI'wI'vaD jIQum ... 12:34 ... Hoch ropmey vIvor 'ej tay chu' vIcher ... pay' rarHa' blogger. Do' lotHomvam vIpIHmo' QonoSHom vIchoqmeH Notepad vIlo'ta'.

vIDIlbe'mo' jIbep 'e' vIbajbe' 'a berghmoHbej ghu'. vaj jIbergh.

jIH

2005-03-20T13:43:00.000-08:00

naDev yot tlhInganpu' Danejchugh choSam. tugh HablI' vIrar 'ej naDev vIcha'.

QI'yaH QIj Qap Blogger patqoq jay'. tlhoS vIlo'laHbe'. HoS ghurnIS jatlh Blogger 'a De'wI' qawHaq joq qelbe'. 'ul'e' qel. De'wI'chajvaD yapbe'law' 'ul. Dejchugh Blogger QonoSvam naQ vIchIl. De' choqmeH mIw Sov'a' vay'?

QonoSHomvam vIqontaHvIS narghbe'ta' Publish Post SeHlaw. wej rIn jIHvam. wejpuH. yImoD jay'! Qovpatlh.

Hol cham: QonoS sans frontières

2005-03-19T22:02:00.000-08:00

DaHjaj QonoSvam Daj vItu'. Hol qel qoj Dajchugh vay' vaj tlha'qang. vIlaDchoHDI' SIbI' vItIv. muSIghbe' muD Duj cha'bogh. :)

DIvI' HolvaD ravDaq nechmeH laH Del neHchugh vay', Doch nechbe'laHghach juvlu'. 'a vIran'eS HolvaD nechlaHghach'e' juvlu'law'. mu' togh, mu' poj, mu' tIvlaw' Jean Véronis.

Holvetlh DalaDlaHbe'chugh yIjeghQo'. rut DIvI' Hol lo' je.

jatlh 'orwI' jatlh mughwI'

2005-03-15T22:30:00.000-08:00

QonoSvam vIqelqa' lutvam vIleghDI'. 'a QonoSwIj cha'DIchvaD vIlo'laH je.

pIj DIvI' Hol vIlo' vIneH. tlhIngan Hol vIlonlaw'lI'. vaj QonoS chu' vIghaj.

naDev vIpongbe' 'a QonoS chu' qonbogh 'orbogh be' boSamchugh tughov. Daq vImughchugh <muD Duj 'orwI'> vIlo'laH.

High qoj Tight

2005-03-05T16:23:00.000-08:00

DaHjaj po Google News vIlaDtaHvIS lut tlhaQHa' vIlegh. "Security High for Judge's Husband's Funeral" vIlaD. nuqjatlh. vInuD. bIngDaq "Security Tight" ghItlhlu'. qanaDaDaq chech 'oS High, Tight je. lut vIvaqchoHDI' choH lut. chaq tlhaQHa' 'e' lutlhoj latlhpu'.

nay chu'

2005-03-04T20:27:00.001-08:00

DaHjaj jIrop. qaStaHvIS jaj law' jISopHa'mo' 'ej tlhoyHa' jIQongmo' jIropchoHpu'. muHup porghwIj. DaHjaj jIvor'eghmeH jISopqu' vIneH 'a Soj law' vIghajbe'. vaj Soj Huj vISop. HIlel vIvutmeH Nutella garlic je vIDuD. ghaytan qo'Daq Nutella garlicje HIlel waDIch'e' vISoplI'. vItIvlI'.

Babel

2005-02-25T20:04:00.000-08:00

murar Daqvam. tulwI' Hol, roSIya Hol je lujatlhtaHvIS tlhIngan Hol luqel ghIq Hol law' much wa' nuv. Babel lut mugh Hol law'. vItIv.

Technorati vIDaj

2005-02-25T19:50:00.000-08:00

jIHvaD "Klingon Blog" nejtaHmo' Google DaqHomvam vItu'. pat vIyajbe' 'a vIrarchugh vIghaqlaw' 'ej tlhIngan nejchugh vay' vaj bo logh Sam 'e' vIchup. ghaqmeH mIw vIpabmeH mu' Klingon vIlo'nIS vaj mIw vIlo'.

wIv

2005-02-24T22:44:00.000-08:00

ghojwI'wI' vIqel. tlhoS 'orwI' mojrup ghojwI'wI'. 'a wa'leS qaD SIQnIS. wa'leS qaD nIDbe'chugh, taH 'e' lajbe' DuSaQ. 'a wej nIDrupbej.

«HIvoq» jatlh ghojwI'. «vIta'laHbej». 'ej ta'laH. 'a qaD nIDmeH ghojwI', ta'laHqu'chugh yapbe'. ta'nISbejqu'. DIch vIghajbe'. wIvwIj vIpay' vIneHbe'. Qapla' chav ghaH vIneH.

muD Dotlh

2005-02-24T10:33:00.000-08:00

qaStaHvIS wejmaH rep muD Dotlh paQDI'norgh chu' vImuchnIS 'a vImuchrupbe'. nabmeH wejmaH rep vIghajbe'. va.

jarvam muyu' muD Duj malja' 'e' vIpIH vaj jIHaDnIS 'a jIHaDlaHbe' jImuchnISmo'.

Do'Ha' paQDI'norgh qab SIQnIS ghojwI'wI'.

maw' qorDu'wI'

2005-02-22T10:00:00.000-08:00

Hoghvam nuSuch loDnalwI' vav SoS je. DaHjaj verghDaq vIghom 'ej Duj nojbogh SuyDaq vIDor. SutlhtaHvIS chaH, HurDaq tepchaj vI'av. qaStaHvIS poH nI' jIloS. qay'.

chIjmeH chaw' lIjpu' loDnalwI' vav. ghor Duj chIj neHbe' loDnalwI' SoS. mebpa'chajDaq chaH vIchIj.

jIvIng

2005-02-20T08:52:00.000-08:00

QonoS motlh mojpu' bo logh 'e' vImaq 'a DaHjaj QonoS motlh DIb vIDoQ. jIvIng.

Hoghvam wej SaD rep vIvI'ta'. qaStaHvIS tera' DIS cha' SaD loS cha'maH SaD dollar vIvI'be'. DISvam wejmaH chorgh ben vIboghpu'. muD Duj machqu' neH vIpuv. lojchoHlI' poH 'a Qapla' vIchavbe'lI'. mutung ghu'.

jIghung. jIDoy'. jImogh.

jISaQ.

quS'a'Daq

2005-02-19T08:49:00.000-08:00

muchvaD yu'lu'taHvIS vay' quS'a'Daq ba' meb, yu'wI'Hompu' je' net Sov. cha' yu'wI'Hom lutu'lu': be' loD je'. Quch chaH. (toH, yu'wI'Hom Quch jIjatlhDI' perky talk show host Dayaj'a'?)

mataghpa' 'aHwIj wInuD. paqmey, HolQeD, Quch je vIqemta'. Quch vItuQ 'e' chupDI' be' 'a jIjatlh «vItuQ 'e' vImevta'. yItuQ SoH». tuQ neHbe' 'a tuQqang loD, leghDI' be' HaghchoH 'a poH naQ tuQtaH. jatlh "journalistic integrity" 'oS.

Valentine jajmo' mutlhob "I love you" jatlhlaH'a' tlhIngan? muS/muSHa' vIQIj 'a chay' QIj tlhIngan luSov luneH. Qul'a' chaH? nab'a' chaH? vISovbe' 'a pup 'eb. poH woDbe' tlhIngan 'e' vIQIj 'ej loDvaD chemvaH vIDa'. ghaH vIcholtaHvIS jIQIj «bIngaghrupbe'chugh vaj mu'tlhegh le' DajatlhnIS».

«yImoD! wa' HIghojmoH!» jatlh.

«DaH jIbwIj vISay'nISmoH» jIjatlh

«nuq 'oS» jatlh be'.

ghaHvaD vImugh.

SIbI' jatlh «mu'tlheghvetlh vIlo'ta' jIH».

wInabta'be' 'a Qapbej.

rInDI' much meb chong SoH jatlh.

wITiVota' vaj chaq Sacha'laHchuugh. mIw boSov'a'?

pa' SuD

2005-02-17T09:55:00.000-08:00

Hoghvam povmo' muD Dotlh jIvumqu' 'ej QonoS qonmeH poH vIHutlh vaj QIt yu'lI'ghach vIDel. jIpawDI' <pa' SuD>Daq vIDevlu' 'ej pa' jIloS. pa' wa'Hu' much cha'lI' HaSta. Soj, bIQ je munob lIqwI' 'ej latlh mebpu' vIqIH. meb Qav jIH.

vIyu'lu'

2005-02-16T00:02:00.000-08:00

ramvam much vIbejpu'. muHaghmoH. DaH jIQongnIS.

Roll Tape

2005-02-12T22:50:00.000-08:00

muchvamvaD mu'tlhegh puS vImugh 'e' tlhob much chenmoHwI'. cha'leS muqel much vaj much lunab.

cha' mu'tlhegh jummo' jISIv:

wa') Hello, welcome to our show.

qech'e' ghajbe'bogh tlhIngan Hol vImugh luneH 'e' vIQIj. vImughmeH jIjatlh: «peba'. muchmaj yIbej.»

cha') Roll tape and die

Huj mu'tlheghvam. «Hoqra' yIchu'» ra' 'ay' wa'DIch 'a «yIHegh» ra''a'? buQbe'law'. Seng vIQIj, 'a vImughmeH jIjatlh «Hoqra'! batlh maHegh!»

parmaqqay

2005-02-12T06:35:00.000-08:00

wa'Hu' CBC wa' vI'IjtaHvIS February wa'maH loSDIch jaj luqel. DIvI' Hol mu'tlhegh «I love you» luqel, 'ej Hol SarvaD jatlhmeH mIwmey togh. pay' «tlhIngan HolvaD cha' mIwmey lutu'lu'» vIQoy.

'Iv lughel? chay' Dajatlh? «qamuSHa'?» «qaparHa'qu'?» «parmaqqay SoH vIneH?» «qaneH?»

Hol yo' yajHa'lu'bogh muvpu''a' Holmaj? ngoDqoqvetlh Hal vISov vIneH.

Gong Hey Fat Choi

2005-02-10T01:19:00.000-08:00

DaHjaj chaynanganvaD tagh DIS chu'. yupma'mo' 'IHbogh Doch boch munob ghojwI'. yuch ngaS, jatlh. wej vIpoSmoHta'mo' vIHarnIS.

qanaDa Dab chayna Sung law' 'ej DISvam yupma' wIloplaw' Hoch. HochvaD jIajatlh «ghung 'ay vat choy». bIchepjaj 'ej bIDo'jaj 'oSlaw'. tIgh Sar tIvlaHDI' Hoch mubelmoH ghu'. mubelmoH je nuv Quch, yuch je. vaj jIQuch.

DIvI' Hol P

2005-02-09T11:07:00.000-08:00

physics -- ghogh lo'be'bogh v rur wab wa'DIch

psychic -- loQ tlhIngan S rur wab wa'DIch

pneumatic -- tlhIngan n rur wab wa'DIch

pick -- tlhIngan p qu'Ha' rur wab wa'DIch

mISmoHlaH tlhIngan Hol net Har. wejpuH.

qech QIp

2005-02-05T07:06:00.000-08:00

po rut tlhutlhmeH yuch vIvut. ngaSwI'Daqa loSlogh baghneQ vIlan 'ej loSlogh yuch QaD vIlel. HIvje'Daq yuch QaD vIlan, ghIq HIvje'Daq pubtaHbogh bIQ vIlIch. vIDuDta'DI' vItlhutlhlaH. ghaytan mIw DaSov SoH.

tlherbe'taHmeH yuch QaD, Hap Segh wa'maH loS ngaS. ngaSwI' vIpoSmoHDI' 'ej baghneQ vIlo'taHvIS vIlargh. reH «Hapvammo' mungejlaH'a'pneumonoultramicroscopicsilicovolcanoconiosis?». vaj vIlarghbe' 'a' vInID.

Dutlhej'a' qech QIp? nIbeQmoH SalmeH pa' lojmIt 'e' DaHaj? jorlaH HaSta 'e' DaqeltaH'a'?

pIqaDlIj'e' yIchenmoH

2005-02-03T23:49:00.000-08:00

pIqaDHey chenmoHlaH nuHvam. jIQongnISmo' vIDelbe'. yInuD SoH.

muSovmoH SuStel.

choH bo logh

2005-02-02T10:38:00.000-08:00

qaStaHvIS wa' DIS Hol qellI' bo logh Holvam latlh Hol je qel. DaH vIchoH. QonoS motlh moj. choHlI' 'e' vItlhoj vaj choHvam vIlaj. Hol vIqelmeH vIraD'eghQo'.

DaHjaj lut Quch vIlaD. wejmaH chorgh nuv HoHbe' yu'egh'a'. puHHom machDaq yIn, naHlet'a'mey SoptaHvIS. jIbel. lutvam Segh vIparHa'qu'. vay' vIchIlpu'chugh vISamDI' jIQuch, 'a not vIchIlpu'chugh jIQuchchoHbe'.

mu'mey vIHutlh

2005-02-01T10:56:00.000-08:00

'ayraqDaq SuvtaH 'amer'I'qanngan negh 'ach motlh ghu'vetlh vIbuSbe'. DaHjaj wIv'a'chaj vIQulmeH De' vIlaDchoH 'ej ngoD vIqelta'be'bogh vISam. rIQ mang QoghIj law'.

motlh qaStaHvIS veS, rIQqu'DI' vay', Hegh. rIQqu'DI' nach, SIbI' Qel poQ nuv. nom Hegh. 'a DaHjaj po'qu' Qelpu' 'ej nom rIQlu'pu'wI'pu' HIjlaH QI'. Heghbe'. tlhIngan chaHchugh, che'ronDaq Hegh mang net chaw'. 'a tlhIngan chaHbe' 'amer'I'qanngan QI'. neghvam toD.

chen qechmey law'. vIjanglaHbe'. vIghellaHbe'. qaStaHvIS DIS law' Qaw'taHghachvam DIl 'amer'I'qanngan roghvaH. ropyaHmey DIlnIS, yIn loj DIlnIS, 'ej HeS DIlnIS. vIyyetnam noH mang maw' DIqaw. 'ayraq mang maw' law' vIyyetnam mang maw' puS 'e' vIpIH. World Trade Center Qaw'lu'DI' choH 'amer'I'qa', 'a wa'maH jav nem mangvetlh rIQ potlh HoS qachvetlh beQ potlh puj 'e' vIHar.

ghaytan De'vam boSov 'a DaHjaj vISovchaH jIH. motlh qum qelbe' bo logh. vay' vImaw 'e' vIHechbe'. De'vam vISamDI' jIjatlh vIneH neH.

loD toD logqoq

2005-01-30T06:41:00.000-08:00

Hol qelbe'chu' lutvam 'a vItIv. Hoch jaj loD Such Ha'DIbaH qu' 'ej Ha'DIbaH qu'vaD jatlh loD. qaSDI' yu'egh'a' bIQ'a'Daq pum loD 'ej toD'eghlaHbe'. SorHey 'uchchoH 'a Sorna' 'oHbe'. Ha'DIbaH qu' 'oH. loD Sopbe' Ha'DIbaH. toD. lut vIHarbe' 'a vItIv. lut Life of Pi (Pi yIn) muqawmoH. paqvetlhDaq cha' lut tu'lu' 'ej lut maSbogh laDwI' wIvlaH. lut wa'DIch maSba' Hoch 'a teH lut cha'DIch pIH. ghIq tlhoj laDwI' lut'e' neH vaj wa'DIch wIvlaHchu'.

choHlI' QIch

2005-01-29T06:44:00.000-08:00

mu' jatlhDI' 'amer'I'qanngan, 'engpuHngan je, jaS jatlh. 'a rurchuqchoH QIchmey 'e' Har Red Ryder. mumerbe'chu'. wej rurchuqchu'mo' mumer. mul QIchmey.

legh'eghmeH mIn

2005-01-27T10:15:00.000-08:00

mIn leghmeH pat vIqelta' muvuQmo'.

Human chenmoH Qun 'e' luHar nuv law'. chen neH Human 'e' luSIm latlhpu'. pIj ghoH. jatlh HarwI'pu', chay' chen neH mIn? lI'Ha' mIn bID; lI'meH mIn QapnISchu'mo' 'oghnIS vay', vaj 'ogh Qun.

jatlh SImwI'pu', lI'bej mIn bID. loQ QIb DaleghlaH neH, leghlaHbe'chu'wI' DajeylaHbej.

ghaytan HartaH HarwI' 'ej SImqa' SImwI' 'ach QullI' tej. chen mIn 'e' HaD EMBL.

muSovmoH Scribo.

puvtaHvIS jatlhlaHbe' ghojwI'

2005-01-25T19:21:00.000-08:00

muD Duj puvmoHtaHvIS orwI', SaqmeH Duj SeHwI' rI'nIS. DuSaQwIjDaq puv 'e' ghojlI' SeHwI'. yaHDajDaq lI'chu'. mu'mey qaw, mIwmey pab, Hoch muD Duj SeH. DujDaq Hoch qagh'e' HeSlaHbogh ghojwI' HeS. jIHvaD Daj.

qaghDI' ghojwI'wI', yajchu'be' motlh 'e' vIHar. vaj vIQIjqa'. 'a yajba'taHvIS SeHwI'vam QaghtaH. ghaH mISmoHbe' mIwmey. ghaH mIS Qu''e'.

latlhpu' vIghojmoHmeH ghaH vIpoj vIneH.

chang'engmey

2005-01-24T07:22:00.000-08:00

cha'logh SaHchugh wa' Degh 'ej chavchuqbe' latlh Degh, chang'eng vIpong. vItIv. Hol chu' vIghojchoH vIpoj vIneH. tlhIngan HolvaD SaH chang'eng law'.

                  

SaHbe'        je. chaq ! (SuH) vIlo'laH 'a puj. tuQaHlaH'a'?

bo logh qoS

2005-01-23T21:17:00.000-08:00

wa' ben bo logh vIchenchoHmoH. ngugh tlhIngan QonoS SamlaHbe'mo' vay', wa' vISaHmoH vIneH. DaH SaH tlhIngan QonoS 'e' temlaH pagh. vagh netlhlogh Sam Google 'ej bo logh Del HochHom. bo logh Suchlaw'pu' wej netlh nuv. Googlemo' muSam HochHom. 'a munoy'moH Daqmey law' je. motlh bo logh lunuS laDwI'pu' 'a rut luHo'. wa' laDwI' vuDchoHta' bo logh.

qaStaHvIS DIS tlhIngan HolvaD potlh qu' wa' wanI': Earthlings. muchvetlhmo' Cannes wIghoS 'ej 'oHmo' tlhIngan Hol qIH nuv law' 'e' vItul.

ngoQDaj chavta' bo logh 'ej wa' wen vIlon 'e' vIHech. 'a vIlonbe'law'ta'. qaStaHvIS DIS veb rut vIghaq 'ej rut vIghaqbe'. chaq wa' nem vIlonta'.

Kronstintmey Vooblemey je

2005-01-22T20:36:00.000-08:00

rurchuq a e I o u je 'ej rurchuq b ch D gh j l m n ng p q Q r S t tlh v w y ' je. pIm cha' ghommey 'a wabmeyvam Seghmey pIm DelmeH mu' Hutlh tlhIngan Hol. vagh ben ghoHtaHvIS jatlhwI'pu', HaqmeH Seqram mu'meyqoqvetlh 'ogh. mu'meyvetlh vISaHbe', 'a qelbogh cha' lut tlhaQ vISov. ngo' bIH 'a DaSovbe' chugh DalaDnIS 'ej DaSovchugh chaq DalaDqa' 'e' DatIv.

Bosnia boQ Clinton

latlh qon Dave Barry. Hawaii Hol Del, 'a Do'Ha' vIcha'laHbe'.

bID qech bID lut

2005-01-21T08:18:00.000-08:00

Hol ghojmeH nuvvam choHlI'bogh lutmey laD neH. taghDI' lut DIvI' Hol neH laD neH 'a' taHtaHvIS lut QIt choH mu'tay' pab je. latlh Hol moj 'ej mojtaHvIS Hol chu' ghojlI' laDwI'. chovnatlh cha'be' qonwI'.

DIvI' HolvaD tlhIngan HolvaD je lut qonlaH'a' vay'? Qap'a'? vIHon 'a mumerlaH valwI'pu'ma'.

- 

2005-01-20T20:39:00.000-08:00

Cannes      .    

 «» «»  

         ▼           

   «»  ▲         ▲      ▲      ▲       ▲   

          ▲      ▲        

▲ ▼ ▲ ▼ ▲ ▼

qatlh licorice allsorts mIvHom vIje'laHbe'?

2005-01-19T13:36:00.000-08:00

lazyblog.orgDaq Qu' Why can't I buy a liquorice allsorts hats? chav QonoSHomvam. naDev 'oHmo' chonaD(Ha')laH.

cha'logh muqaD Qu'vam.

 qech Huj vIjangnIS

 tIvnIS tlhIngan Hol lujatlhbe'bogh nuv

batlhwIj vIchoqnIS, vaj jI'ov!

lut muqawmoH Qu'vam. wa' jaj ghojwI'DajvaD Qu' nob QeD ghojmoHwI'. chaHvaD jatlh: qatlh ghogh HablI' pong tetlhDaq pong Jones law' law' pong Smith law' puS? ngerraj vISov vIneH.

ngermey val 'ogh Hoch ghojwI' 'a yonbe' ghojmoHwI'. law'bej Jones 'olbe'ta' pagh. pong tetlhchajDaq pong Smith law' law' pong Jones law' puS. toghta' pagh. QeD paQDI'norgh potlh 'oH.

vaj vIjangpa' licorice allsorts mIvHom vIje'laHbe' 'e' vI'olnIS. nuqDaq Doch Huj je'laH vay'? toH: InternetqoqDaq.

Smithsonian InstituteDaq licorice allsorts Dung mIvHom vISam. Smithsonian InstitutionDaq tu'lu' 'a lungevqangbe'. 'aH boS Smithsonian Institution 'ach ngevQo'. chaq dollar law'qu' vInobqangchugh vIDIllaH 'a vIHon. tlhIngan Hol laDlaHbe'wI'vaD dollar, pound sterling, quetzal, DeQ je vIqel. boDegh 'oH quetzal 'e' 'a GuatemalaDaq DeQ 'oH je.

vaj e-Bay vISuch. pa' SIbI' Bertie vISam. licorice allsorts ghaHlaw' Bertie'e'. mIvHom tuQba' ghaH 'ej licorice allsorts 'oHlaw' mIvHomDaj'e'. vIje'laHba'. vaj teHHa' nger. vIje'laHbej.

pItlh.

qatlh muSuch yajlaHbe'wI'?

2005-01-17T08:32:00.000-08:00

qen bo logh laDmeH laHmey vIpoj. laDlaHbe'chu' HochHom laDwI'qoq.

jatlh wa' laDlaHba'wI' «jIH vImerlu'. law'qu' yajlaHbe'wI'. qatlh bo logh luSuch? qatlh yu'wI' lujang?»

jIH mumerbe' ghu'. vIpIHmo' wIv luyajlaH jatlhbe'wI' vIqon. bo logh Suchpu' wej netlh nuv. nej bID, bo logh vaqbogh Daqmo' Sam bID. pIj jatlh vay' «Daqvam Huj yIlegh». chaHvaD Hujbej bo logh. chaH qaD 'oH. DaqvamDaq wa' mu' luyajlaH: «Huh?» ghelbogh mu' yajbe' 'a jangmeH pup «Huh?» 'e' luSov. vaj jang.

latlh wIv luloy 'e' vIbotmeH, chaHvaD wIvvetlh vIlan. yu'wI'wI' nIS loywI' vIneHbe'.

Heghchugh Hol, SaH 'Iv?

2005-01-16T20:53:00.000-08:00

yu'egh'a'mo' Hegh cha' bIp nuv 'ach Heghlaw' je Holmey. HeghDI' Hoch jatlhwI', SIbI' Hegh Hol. jatlhwI' juH Qaw'lu'DI' HeghchoH Hol.

ghel kaleboel jangqanglaw' pagh «how much languages are worth, to whom, whether some languages are worth more than others, and whether language differences are all cost, no benefit, and should be allowed to disappear peacefully»

vuD ghajbej kaleboel: HeghmeH tlhIngan Hol vumnIS vay' 'e' jatlh. SapwI'pu' nej. qIDlaw'.

▼? ▲!

2005-01-12T00:00:00.000-08:00

     ▲ rut DIvI' Hol Deghmey vIlo'.

  

roD, yev laDwI' vIneHchugh «▼» vIlo' 'ej mev laDwI' vIneHchugh «▲» vIlo'. mu'tlhegh jojDaq neH vIlo' vaj Dachchugh mu'tlhegh veb, vInop.

Lucas 'u' Hol vIqelqa'

2005-01-11T01:10:00.000-08:00

<Hov veS> vIbejtaHvIS, pIj QumtaHvIS cha' jatlhwI' Hol pIm jatlh 'a yajchuq. motlh GreedovaD jatlhtaHvIS Han Solo DIvI' Hol jatlh Han nov Hol jatlhtaHvIS ghargh. ja'chuqtaHvIS C3PO R2D2 je reH DIvI' Hol lo' C3PO qoq Hol lo'taHvIS qoq run. DIvI' Hol yajchu'law' Chewbacca 'a lInglaHbe'mo' HolDaj yajnIS Han.

mughDI' C3P0, HochvaD DIvI' Hol jatlh. wa'logh latlh Hol jatlh C3P0. Ewokpu'vaD qun jatlhtaHvIS C3P0 Ewok Hol lo', 'a yaj R2D2. Ewok Hol jatlhtaHvIS C3PO DIvI' Hol mu'mey Qoylu'. vItIv. vItmoH wanI'Homvetlh.

muchvaD lI' ghu'vam: nov cha' 'a lut qaghbe' mIw. wa' nuv neH DayajlaHchugh qech luqelbogh DayajlaHbej.

yInvaD lI' je ghu'vam. wabmey nov lIngnISbe' 'IjwI'. pab napHa' chennISbe'moH 'a 'IjtaHvIS yajlaH. OttawaDaq pIj cha' Hol jatlh cha' jatlhwI'.

DIp wotchoHmoH ngevwI'

2005-01-10T10:29:00.000-08:00

Dochmey ngevmeH ngevwI' Dochmeychaj maq chaH. qaStaHvIS cha' DIS, rav Say'moHwI' chu' ngev net nID. Swiffer ponglu'. Dalo'ta'DI' DawoD. Say'moHwI'vetlhmo' reH Hagh loDnalwI'. Doch ru' mojpu'mo' Say'moHwI' motlh, Say'moHwI' je'nISqa'taH vay'. val 'oghwI'pu' 'a je'wI'vaD QIp qech.

Swiffer ngevmeH chaH, jatlh «yISay'moHQo': yISwiffer!» wot moj pong.

wot mojpu'DI' pong, pong DIp chIlchoH 'oghwI'. Xerox, Scotch tape (Sellotape), Kleenex je tIqel. DaHjaj choH Swiffer QIn 'e' vIQoy. DaH «yISay'moHQo': Swiffer yIlo'» lumaq chaH.

Swiffer rur bogh Dochmey tIje'Qo'. yuQmaj wIchoqmeH, Dochmey DIghajnISDI', Dochmey DIpollaHbogh DIje'nIS. mep veQ QIp wIpoQbe'.

nIDel Daq DaSuchbogh

2005-01-09T13:11:00.000-08:00

DuDel'eghmeH, nejmeH DaqDaq Hoch letter yIlan. Daq wa'DIch qawbogh De'wI'lIj yIja'. motlh tlhIngan Hol lulo'be'mo' Daq pongwI', gh ng ' Hutlh tetlhwIj.

a b ch D e gh H I j l m n ng o p q Q r s t tlh u v w y '

muD Dujmey Hol joq qel HochHom, 'a HujwI'mey lutu'lu' je.

Rachelvo' qechvam vISuq.

bo logh laDmeH laHmey

2005-01-08T10:03:00.000-08:00

Saghel 'ej Sujang (jang je tlhIngan Hol jatlhbe'bogh nuv law'). tera' DIS cha' SaD loS, jar javDIch Satogh.

bo logh laDmeH laHlIj yIDel

wIvmey

vIlaDlaHchu' 'ej Qov Qaghmey vItu'taH

vIlaDlaH 'ej rut mu' vI'olmeH mu'ghom vIlo'

vIlaDlaH 'a pIj mu'ghom vIlo'nIS

loQ vIlaD. Hoch vIyajbe'

naghmey beQ vIbej neH

Huh??? What???

78%

chen 101 wIvmey

DaHjaj vItoghqa'

bo logh laDmeH laHlIj yIDel

wIvmey

vIlaDlaHchu' 'ej Qov Qaghmey vItu'taH

vIlaDlaH 'ej rut mu' vI'olmeH mu'ghom vIlo'

vIlaDlaH 'a pIj mu'ghom vIlo'nIS

loQ vIlaD. Hoch vIyajbe'

naghmey beQ vIbej neH

Huh??? What???

90%

887

chen 991 wIvmey

numerbe' De'vam. tlhIngan Hol yajbe'chu' HochHom bo logh meb 'ej chIDqang.

DaH yu'wI' chu' vI'oghnIS.

lutlhbej'a' HolHom?

2005-01-07T09:25:00.000-08:00

«a very primitive dialect»
--- C3PO, Star Wars Episode VI: Return of the Jedi

mughbogh qoq qel much <Hov veS>. Hol Qoypu'DI' qoq, «HolHom lutlhqu'» pong. pIj Hol DelmeH mu' lutlh lo'lu' vISov vIneHmo' «primitive dialect» vIGoogle. mu'tlheghvetlh'e' lupojta' latlhpu' 'e' vItu'.

qech poj Senator Cilghal. lutlhchugh Ewok Hol vaj vogh SaHlaw' rurbogh Hol 'Itlh 'e' SovnIS C3PO. pa' SaH cham lu'lo'bogh Ewok pagh chaq Holchaj'e' lujatlhbe' Ewok. chaq latlh Segh Hol jatlhHa'mo' lutlh Holchaj.

ghu' laj TheFreeDictionary.com: Gunganpu' QIch rur ghu': SaH Gungan Hol 'a Humanpu'vaD DIvI' Hol puj lujatlh. chaq pidgin 'oH je Ewok HolHey.

Ewok Hol chenmoHmeH mIw Del Daqvam. (DIvI' Hol yISam). Ewok DameH ghetwI'pu', lutmey jatlhbogh be' qan 'Ij.

Ewok Hol ghojmoHlaw' Wermo. Hol De' QIj 'ej mu'tay' much. Dach pab.

pIj «lutlh»chugh Hol, Hol tIch neH perwI'. qechvetlh vIpoj vIneHta' 'a Ewok Hol Daj law' tIchmeH Hol Daj puS. mu'tlhegh «HolHom lutlh» lulaDDI' HochHom <Hov veS> ngotlhwI', cham lo'be'bogh Segh tIch mu'tlhegh 'e' luqelbe'. vaj chaq latlh jaj qech wa'DIch vIqel.

mu' wIHutlh

2005-01-06T08:38:00.000-08:00

waHu' ram jInajtaHvIS, De'wI' jabbI'ID vIlaD. mughel vay' «chay' tlhIngan HolvaD Dochvam vIpong». nagh beQ cha' jabbI'ID. loQ bIng rur.

Dochvam pongmeH mu' Hutlhlaw' tlhIngan Hol.

jInajtaHqu'vIS jIQIjmeH. jabbI'ID vIqonchoH. tera' tI pongbe' tlhIngan Hol. chaq ghew tlhu'moHbogh pormey nguv Hutlh tlhIngan tI. chaq Qo'noSDaq jIjbe' ghew tI je, pagh ghew rI'meH tI He' neH.

jabbI'IDwIj vIlI'rupDI', ghelwI' pong vItu'. mughelpu' Marc Okrand. jIyev. mu' vIchenmoH neH'a'? mu' chenmoHta' Marc 'a lIj 'ej vIqaw 'e' pIH'a'? jISovbe'.

tagh DIS chu' - pelop

2005-01-01T01:15:00.000-08:00

jIchechchu' tera' DIS cha'SaD vagh vIlopmo'. jIngagh vIneH. cha'logh jIDo':

wa') mu'theghmeyvam laDlaH cha'vatlh nuv neH 'ej laDbej wa'maH nuv 'ej SaH chaq wej nuv 'ej muchergh chaH
cha') naDev loDnal tu'lu' 'ej ngaghqang.

DISvam yItIv. pengagh, pechep, peyIn, peQap, pejatlh, peQuch.

taHjaj champagne!

Hol

2004-12-27T10:28:00.000-08:00

rut <Hov leng> <Hov veS> DuD vay' 'ej tlhIngan HolvaD Hov veS Hol ponglu'.

<Star Wars> (Hov veS) wIbejlI' jIH loDnalwI' je, 'a Da'wIpu' ghogh DI'Ijbe'. lIngmeH mIwmey QIjlI' chenmoHwI'pu' ghogh. much Holmey qel.

TatooineyuQDaq tachDaq tlhutlh 'ej jatlh novpu' law'. Holchaj 'oSmeH chenmoHwI' 'avrIqa'ngan Hol lo' chaj. Swahili jatlhbogh ghojwI'pu' qon. Larry Ward Del Lucas. Hol tej ghaH 'ej laH Daj lo': Hol Qoypu'DI' Ward, SIbI' Holvetlh jatlhlaHlaw'. Holna' jatlhbejbe' 'a wabmey lInglaH 'ej rurbogh Holqoq jatlhlaHmo' jatlhlaw'. jatlhtaHvIS Greedo (voHDajbo' wamwI'), ghaHvaD Quechuangan Holqoq jatlh Ward.

Chewbacca HolvaD, mIloD wabmey qonlu'. HughDaq wabmey lIng mIloD 'ej Hol lInglaHbe' Chewbacca wuSDu', vIHbe'mo' Chewbacca jech wuS: poSlaH 'ej SoQlaH neH.

qIHchuq Larry Ward, Marc Okrand je 'e' vISIv.

watlh'a' ngaghta'be'wI'?

2004-12-24T17:27:00.000-08:00

tera'Daq HochHom nughvaD potlh qech 'oSbogh not ngaghta'bogh be'. qechvetlh mu' Hutlhlaw' mu'tay'maj 'a yapHa' watlh.

poHvam bom vImughchoH 'a bom mu' 'IHmoHbe'mo' mu'tlhegh <not ngaghta'bogh SoS> jInmolHomvetlh vIlon.

lutwIj vIDel

2004-12-10T23:04:00.000-08:00

qaStaHvIS jar wa'maHDIch lut vIqon. Commuting 'oH lut pong'e'. Vancouver Dabbogh nuv puS qel. vay' jormoH neH wa'. ngagh neH latlh. pagh neH latlh. vengDaq leng chaH. qIHchuq. rut paw'. qaS wanI'mey ram. jor pagh. Soch netlh mu' vItoghpu'DI' pay' rInchoH.

jISaHqu'chugh mu'mey chu' vIlo'laH, 'ach tlhIngan Hol vISaHbe'choHpu'. jIQoS, 'a qaS. yaplaw' wa'maH jav DIS.

yaplaw' je wa'leS muD Dotlh. jIpuvlaH 'ej puvlaH je ghojwI'wI'.

pItlh

2004-12-02T14:28:00.000-08:00

jIQapta'. jav netlh Hut SaD javvatlh javmaH Hut mu' vIqon 'ej rIn lut. DaH lut Sagh vIqon vIneH. lutmey vIqonmeH tlhIngan Hol vIlo'taHvIS, qatlh Sujatlhbe' DIvI' Hol lut vIqonlaH?

ghaytan QonoSvam vIlon. mutlhu'pu' jInmol chu'.

vagh netlh mu'

2004-11-02T17:58:00.000-08:00

qaStaHvIS jarvam bologh vISuchbe'. qatlh? QIj vagh netlh mu'. QIj wa' mu'Hey. NaNoWriMo. 'angghal yISovmoHQo'.

tlhIngan Hol De'

2004-10-17T11:14:00.000-07:00

jIngoy'nIStaHmo' bologh vIbuSHa'law'taH 'a De'vam vInopbe'nIs. ghaytan SovwI' Qav jIH 'ach DaHjaj tlhIngan Hol De' maqwI' mu'ang ghojwI'wI'. qaHoy, muHwI'.

Hogh jajmey

2004-09-20T18:37:00.000-07:00

tera'Daq wa' Hogh luchenmoH Soch jajmey. jaj DIpongmeH yuQmey, Qun tIQ joq DIlo'. pongmeH pat poj Greg. Soch jaj lo'choHDI' wo', pongmey 'oghnISlu'.

tlhIngan Hol wIjatlhtaHvIS pIj Hogh jaj DItogh. Hogh jaj wa'DIch, Hogh jaj cha'DIch je majatlh. Do'Ha' tera'vaD jaj pongbe'ta' tlhInganpu'. chaq rurbogh pat lulo': Hovjaj, maSjaj, Qo'noSjaj ... ?

vulqangan Hol jatlhbe' Hoch vulqangan

2004-09-19T21:07:00.000-07:00

Cathay Pacific toy' ghojwI'wI'. muD DujDaq raQpo' boQ. chayna'ngan rur ghaH 'a qanaDaDaq bogh. DIvI' Hol jatlhchu' 'ej loQ chayna' Hol jatlh. chayna' Hol jatlhnISbe''a' Cathay Pacific raQpo' boQwI' jIjatlh. QIj ghojwI'wI'. Hong KongDaq malja' vImuv. qanaDaDaq vImuvchugh chayna' HolwIj chovlu'. Hong KongDaq muv neHDI' vay' DIvI' HolDaj chov. pupmo' DIvI' HolwIj jIQap.

jIghel: chayna' Hol DajatlhtaHvIS chach mIw DaDellaH'a'?

jang ghaH: ghobe'. napHa'bej Hol.

tojwI' ghaH.