bo logh

wa'maH vaghHu' Inuktitut ('enuqtItut) Hol De' vIlaDlI' Nunavut Arctic College Daq vItu'. Dajlaw' paqmey ngev'bogh vaj DuSaQ'a' vIrI'. «chay' vIDIl net chaw'?» jatlh jangwI' De' qalab. DaHjaj paqmey'e' De' je vIHev! 'enuqtItut pIqaD luDelbe' paqmeyvam, 'a ngeDlaw' pIqaD: mI'QeD rurlaw'. ghaytan 'enuqtItut qun Daqmo' pat vISImlaH. roS'et'a' nagh 'oHba'. toH, jIvalqu'chugh, Hol'e' vISImlaH. chaq paqmey vIlaDpa' patvetlh vInID. qaSDI', tlhIHvaD Qapla'wIj vIja'.

wa' 'enuqtItut ngoD vI'maqnIS: peD 'e' DelmeH 'enuqtItut Hol, le'be'qu' Hol mu' mI'. 'enuqtItutvaD boqchuqtaH mu' 'ay'mey. peD 'e' SIQchugh Hol jatlhwI'pu', rurbogh mu' mI' ghaj Holchaj.

ghaytan Qu'wIjmo' tugh nunavut vIghoS.

bo logh laDmo' pagh jIH neH vIbelnIS. puH pongmey vI'oSmeH Dup puS vIqellI' 'ej vIlo'pu'. wa' vIwIvnIS.

wa': DIvI' Hol pong vIlo'laH: England, Russia, Thailand joq vIghItlhlaH. QaQ pat net maqlaH. nap. yajlaH Hoch. ghaytan 'ejyo'mo' DIvI' Hol pongmey ghojbej tlhIngan SuchwI'pu'. rut vIlo' 'a patvam vImaSbe'. DIvI' HolDaq tlhIngan Hol baghlaw' pat. motlhmoH QonoSwIj. 'ej pIqaD vIlo'choHchugh ratlhnIS ASCIIHey mu'meyvetlh. pongmey nov quchlaH Holna' 'ej choHmoHlaH.

cha': puHchaj pongmey vIlo'laH: England, россия, ประเทศไทย joq vIghItlhlaH. vItIv 'ej QonoS HujmoH, 'a patvam lo'be'ba' Hol. laDtaHvIS chaq Hol ghovlaH vay', 'a jatlhlaHbe'. not patvetlh lo' tlhIngan. rut vIlo'.

wej: pat cha'DIch vIlo'laH 'a DIvI' Hol pIqaD vIlo'laH. patvam QIp law' pat wa'DIch QIp puS DaH 'e' vItlhoj, 'a rut vIlo'pu'. England, Rossiya, Prathet Tai joq vIghItlhpu'. cha' Hol nov wuvmo' patvam, vIlajbe'.

loS: puH pong vImughlaH. 'engpuH, tay'bogh 'amer'I'qa' wo'Hommey, vInpuH vIghItlhlaH. patvam vItIvqu' 'a nuq 'oS россия? Hoch pongmey vIQulqangbe'. rut patvam vIlo'.

vagh: puHchaj pong wab'e' jatlhlaHbogh tlhIngan Hol jatlhwI' vIghItlhlaH: 'englanD, roSI'ya', pIratlh'et tay joq vIghItlhlaH. tlhIngan Hol jatlhchu'be'chugh vay', mISchoH. puH Hol puH pong Sovbe'chugh vay' yajbe' 'a jIHvaD neH QonoSvam vIchenmoHmo', patvam pat loSDIch je vIwIv.

yajmeH Hoch, naDev puH pong tetlh vIleH.

tlhIngan Hol	DIvI' Hol
chayna'	China
Denmar	Denmark
Doyche puH	Germany
lItuvya'	Lithuania
nIpponya'	Japan
norSIq	Norway
nunavut	Nunavut
polpuH	Poland
portughal	Portugal
puH'eS	Netherlands
qanaDa	Canada
qo'rI'ya'	Korea
qu'ba	Cuba
roSI'ya'	Russia
Srebya'	Serbia
SIlavngan	Slav[ic]
Su'ome	Finland
taypuH	Thailand
turqI'ya'	Turkey
t'w	USA
vIran'eS	France
'amer'I'qa'	America
'aStalya'	Australia
'ayran	Iran
'ayraq	Iraq
'engpuH	England
'enuqtItut Hol	Inuktitut
'eSpang	Spain
'eSper'anto' Hol	Esperanto
'InDon'eSya'	Indonesia
'Italya'	Italy

vIlo'choH 'e' vIHech.

ngan vIqelDI' vaj qanadangan, roSI'ya'ngan, 'amer'I'qa'ngan joq vIghItlh. Hol vIqelchugh vaj 'Italya'ngan Hol, Srebya'ngan Hol, taypuHngan Hol vIghItlh 'a puH 'oHchugh mu' 'ay''e', rut vInop: polngan Hol vIghItlh vIneH.

vay' DawuqnIS'a'? yInlIj DaqellI''a'? vay' Daghel DaneH'a', 'a tlhIngan Hol jatlhlaHbe' juppu'lI'? DaH bIghelmeH tlhIngan Hol Dalo'laH, jangchu'mo' ngabwI' «moQ chorgh». yIQuj!

QIch pong qoj vI'aghmeH, roD <Dochmeyvam> <<Dochmeyvam>> ghap vIghItlh. <<Dochmeyvam>> vIlIngmeH cha'maHlogh leQ vI'uynIS: &lt;&lt; &gt;&lt; vIghItlhnIS. 'ej &vaD SHIFT-leQ vI'uynIS je. «Dochmeyvam» vIghItlhmeH, loSlogh mouse vI'uynIS 'ej wejlogh leQ vI'uynIS: SeHlaw choHwI' vIwIvnIS, SeHlaw chu' vIwIvnIS, «-leQ vI'uynIS, » vIlIngmeH SHIFT-leQ vI'uynIS 'ej tagha' SeHlaw nov vI'wIvHa'nIS. (SeHlaw nov vIlo'taHvIS «'» vIlIngmeH SHIFT-leQ vIlo'nIS 'ej latlh Deghmey luDuDlu', vaj SeHlaw nov vIlo'taH vIneHbe'. jIHvaD chaq SeHlaw vIghunlaH, 'a DaH Sovvetlh vIghajbe'). leQ 'ar chen wa' mouse? DIch vIghajbe'. jIHvaD «Dochmeyvam» 'IH bIr <<Dochmeyvam>> 'IH tuj.

chay' ngochwIj vIwuq? toH «moQ chorgh» vIghel!

ngabwI' DaqDaq vIchIj ...

jIghelI': <<Dochmeyvam>> vIqelDI` qaq'a' «Dochmeyvam»?

jang «moQ chorgh»: vIHonbe'

pItlh!

qorDu' DelmeH tlhIngan, qechmey vISovbe'bogh lo'. yajtaHmeH tlhIngan qorDu' mu'mey vIqeqnIS. DaHjaj vIpoj, vIbuv 'ej vIlo'.

potlhlaw' be' be'nI', loD loDnI' joq. pIm loD be'nI', be' loDnI' je. be' jIH. vaj puq ghajchugh be'nI'wI' tey'wI' ghaH 'ej me'Daj jIH. loD jIHchugh vaj loDnI'wI' puq ghaH tey'wI''e', 'ej tennuSDaj jIH. puq ghajchugh SoSwI' be'nI', vavwI' loDnI' joq, tey'pu' maH je.

puq ghaj loDnI'wI'. Connor 'oH pongDaj'e'. lorwI' ghaH. lorpu' chaH je SoSwI' loDnI' puq'e'. lor law' vIghaj. vItoghlaHbe' 'a pagh tey' vIghaj.

puq vIghajchugh 'IrneH moj loDnI'wI'. lorDaj ghaH puqwI''e'. cha' 'IrneH vIghaj jIH, cha' loDnI' ghajmo' SoSwI'. Sawpu'mo' chaH, cha' me'nal vIghaj. cha' be'nI' ghajmo' vavwI', cha' 'e'mam vIghaj. not naypu'mo' 'e'mampu'wI', pagh tennuSnal vIghaj.

tey' ghaH tennuS puq'e' 'a lor ghaH tennuSnal puq'e'. tey' ghaH me' puq'e' 'a lor ghaH me'nal puq'e'. tey' ghaH 'IrneHnal puq'e' 'a lor ghaH 'IrneH puq'e'. tey' ghaH 'e'mamnal puq'e' 'a lor ghaH 'e'mam puq'e'.

cha' 'e'mam vIghaj. loDnI' Hutlhmo' vavwI' 'e'mamnal vIHutlh. cha' me'nal vIghaj. be'nI' Hutlhmo' SoSwI' me' vIHutlh. cha' 'IrneH vIghaj.

vavmo' tennuS, tennuSnal, 'e'mam, 'e'mamnal joq ghaj vay'. SoSmo' 'IrneH, 'IrneHnal, me', me'nal joq ghaj.

.......SoSnI'wI' - vavnI'wI'.................................SoSnI'wI' - vavnI'wI'
.................|.....................................................|
______________________________........______________________________
|........................|.............|.......|..............|.......................|
me'wI' - 'IrneHnalwI'..|........SoSwI' - vavwI' ..........|...'e'mamnalwI' - tennuSwI'
........|................|..................\..................|..... .. ..........|
.....tey'wI'........'IrneHwI' - me'nalwI'...\...tennuSnalwI'-'e'mamwI'...tey'wI'
.............................|..........._____|______.............|
..........................lorwI'.... ...|.......|........|........lorwI'
........................................|......jIH........|
..................be'nI'wI' loDnal - be'nI'wI'.........loDnI'wI' - loDnI'wI' be'nal
.......................................|.........................|
....................................tey'wI'..................lorwI'

Qapqu'lI' wa'Hu' to'wIj Dogh. DaqDajDaq vIrar SIbI' 'e' tu' Stu 'ej mISbej ghaH. tugh vIvupchoH 'ej ghaHvaD vImugh, 'a yaywIj vIlopmeH bechwI'pu' chu' vInej. 'op vIboSta' 'a wa' DajwI''e' DaHjaj vIbuSHa'laHbe'.

jatlh lizard (lung) Do'Ha' SeQpIr Sonnet vImaSbogh mughbe'lu'pu'. vInuD 'ej meq vIghov, 'a vIniDchoHpu'DI' mIw vIngu' 'ej nom rInchoH jInmolHom. nIvbeq DIvI' Hol chovnatlh 'a Qaplaw' bomwIj.

vay' neHlI' latlh; QanglI' jIH'e' choghaj.
jIqang, bang qa' qangba', qang jIH, jIqap.
qangwI' DaneHchoHDI' DuyonmoHjaj
Duqoy'taHbogh qangwI': tlhoy yap
toH tIn qanglI'; QeyHa'wI' DaH HIjang,
'ej SoHDaq qang vISo' jIH 'e' yIchaw'
qang latlhpu' 'e' DatIvlaw'chugh vaj qang
qang'e' qatlh 'e' Dalajqangbe'choHlaw'?
yIQchu' bIQ'a' 'a 'oHDaq SIS 'e' laj.
pa' bIQDaj boq latlh bIQ: lajmo' ghurba'.
Qangmo' bImIptaHvIS, qanglI' yInej
'ej qang DaneHDI' qang DaSachmoHta'.
qoywI' 'IH HoHbe'jaj ghobe' qej.
rurchuq Hoch qang 'ej wa' qengwI' jIHbej.

naDev DIvI' Hol DalaDlaH. vIran'eS HolvaD je bomvam mughlu'pu' 'ej DupwIj lo' je mughwI'vetlh. mughwI'vetlhvaD Gérant 'oH vangwI' pong'e'. roSI'ya HolvaD Желание (jel'an'Iye') 'oH pongDaj'e'.

HolQeD QonoSmey puS tu'lu' 'ej laDchuq qonwI'pu'. Do'Ha' QonoSwIj laDlaHbe' HochHom. tlhoS vIpay, 'a Qu'wIj'e' vIghaj.

chaq SKI vIlo'choH.

Holmey qelba' QonoSvam 'ej Stu QonoSDaq Hol ngoDmey Daj vItu'. qen Su'ome Suchpu' 'ej ghaHvaD Daj Su'ome Hol. HaDmeH travlang (lengHol) lo'. Daqvetlh Damuvpu'DI', Hoch jaj wa' mu' lulab. DaHjaj <Ha'DIbaH SopQo'wI'> 'oH mu''e'. tlhIngan Hol <DaHjaj mu'> DaHev DaneHchugh, vaj Holtej Daq yISuch.

nuq bIH pygmygoatmeyvam'e'? tangqa' mach rur goat vaj tangqa' machqu' 'oS pygmygoat'e'. chaq Qugh Ha'DIbaH bIH. ghuSmoH mIw Sov'a' Stu? net SIv.

Holmey ghojlaw'lI'mo' 'ej Daqmey Daj rarmo' neH Stu vIqel'a'? ghobe'. SuchwI'pu'Daj ghochqu'mo' vInuQ 'e' vInID. 'a vInuQ 'e' tIvlaw'. choSuchchugh, vaj Stu yISuchbej.

tlhIngan Hol mu'tay' vIghermeH mu'ghom ghunta'bogh Evolutionary Solutions vIje'ta'. qaStaHvIS Soch DIS lo'taH jupwI' 'ej vaghben mu'tay' tetlhDaj munob ghaH. ngugh QapHa'choHmo' toch De'wI'wIj tetlhDaj vIlo'be'. wa'Hu' wanI'vetlh vIlIjchu'pu' 'ej ghaHvaD vItlhobqa' <chay' De'wI'lIjDaq mu'tay' DaSeH?>. vISIvtaHvIS tlhIngan Hol jabbI'IDghom nejwI' vIlo' 'ej De' vISam.

pupbe' pat, 'a lulo'mo' tlhIngan Hol jatlhwI' law' vIwIv. De' wIQaylaH 'ej qay'chugh pat tI'DI' vay' SovDaj vItIvlaH.

navvam DungDaq ngevbogh maqwI' yIlegh. navwIj De' poj 'e' nID 'ej qechmeyvam rurbogh Dochmey mungev 'e' nID. 'a tlhIngan Hol jatlhbe'mo' Google, motlh De'wIj ghovbe'. rut pagh 'agh, rut Hanguk Hol 'oH 'e' loy. pIj rarwI'meyDaq DIvI' Hol tu'. DIvI' Hol mu' tlhIngan ghovDI' Dochmey ngev 'e' nID. vIbej 'e' vItIv.

# 16:22 lab Qov