<$BlogRSDUrl$>

2005-01-29

choHlI' QIch 

mu' jatlhDI' 'amer'I'qanngan, 'engpuHngan je, jaS jatlh. 'a rurchuqchoH QIchmey 'e' Har Red Ryder. mumerbe'chu'. wej rurchuqchu'mo' mumer. mul QIchmey.

2005-01-27

legh'eghmeH mIn 

mIn leghmeH pat vIqelta' muvuQmo'.

Human chenmoH Qun 'e' luHar nuv law'. chen neH Human 'e' luSIm latlhpu'. pIj ghoH. jatlh HarwI'pu', chay' chen neH mIn? lI'Ha' mIn bID; lI'meH mIn QapnISchu'mo' 'oghnIS vay', vaj 'ogh Qun.

jatlh SImwI'pu', lI'bej mIn bID. loQ QIb DaleghlaH neH, leghlaHbe'chu'wI' DajeylaHbej.

ghaytan HartaH HarwI' 'ej SImqa' SImwI' 'ach QullI' tej. chen mIn 'e' HaD EMBL.

muSovmoH Scribo.

2005-01-25

puvtaHvIS jatlhlaHbe' ghojwI' 

muD Duj puvmoHtaHvIS orwI', SaqmeH Duj SeHwI' rI'nIS. DuSaQwIjDaq puv 'e' ghojlI' SeHwI'. yaHDajDaq lI'chu'. mu'mey qaw, mIwmey pab, Hoch muD Duj SeH. DujDaq Hoch qagh'e' HeSlaHbogh ghojwI' HeS. jIHvaD Daj.

qaghDI' ghojwI'wI', yajchu'be' motlh 'e' vIHar. vaj vIQIjqa'. 'a yajba'taHvIS SeHwI'vam QaghtaH. ghaH mISmoHbe' mIwmey. ghaH mIS Qu''e'.

latlhpu' vIghojmoHmeH ghaH vIpoj vIneH.

2005-01-24

chang'engmey 

cha'logh SaHchugh wa' Degh 'ej chavchuqbe' latlh Degh, chang'eng vIpong. vItIv. Hol chu' vIghojchoH vIpoj vIneH. tlhIngan HolvaD SaH chang'eng law'.

                  

SaHbe'        je. chaq ! (SuH) vIlo'laH 'a puj. tuQaHlaH'a'?

2005-01-23

bo logh qoS 

wa' ben bo logh vIchenchoHmoH. ngugh tlhIngan QonoS SamlaHbe'mo' vay', wa' vISaHmoH vIneH. DaH SaH tlhIngan QonoS 'e' temlaH pagh. vagh netlhlogh Sam Google 'ej bo logh Del HochHom. bo logh Suchlaw'pu' wej netlh nuv. Googlemo' muSam HochHom. 'a munoy'moH Daqmey law' je. motlh bo logh lunuS laDwI'pu' 'a rut luHo'. wa' laDwI' vuDchoHta' bo logh.

qaStaHvIS DIS tlhIngan HolvaD potlh qu' wa' wanI': Earthlings. muchvetlhmo' Cannes wIghoS 'ej 'oHmo' tlhIngan Hol qIH nuv law' 'e' vItul.

ngoQDaj chavta' bo logh 'ej wa' wen vIlon 'e' vIHech. 'a vIlonbe'law'ta'. qaStaHvIS DIS veb rut vIghaq 'ej rut vIghaqbe'. chaq wa' nem vIlonta'.