<$BlogRSDUrl$>

2004-06-26

SuchwI'pu' DIpIHbe'bogh 

wa'Hu' pay' law'qu'choH bo logh SuchwI'. mung ngu'law' ghochwI' patwIj 'a http://www.google.com/url?sa=D&q=http%3A%2F%2Fbologh.blogspot.com%2Fmo' pawlaw'. Quvvetlh vIghItlhHa'be'pu': yIlegh. Do'Ha' Quvvetlh vIyajbe'. GoogleDaq munejlaw'pu' 'a munejbe'ba' chaH.

vaj chay' muSamchoH chaH? 'ej DaH pawpu'DI' chay' DIma'?

yIchup.

# 22:39 lab Qov

2004-06-25

yablIj vIjejmoH 

vIyu'lu'taHvIS bong jIjatlh «yablIj vIjejmoH». «yabwIj vIjejmoH» jIjatlh 'e' vIHech. cha'logh vIjatlhHa' 'ej Qaghvetlh 'agh <Earthlings> wI'IjtaHvIj mabejchuqchoH Qanqor jIH je. 'oy'. chay' mojaq vIwIvHa' jIH?

'a Hoghvetlh QIch Qagh rap vIHeS vIran'eS Hol vIjatlhtaHvIS. «votre» jIjatlh, «notre» jIjatlh 'e' vIHechDI'.

Qaghmeyvetlh chev wa' wab neH vaj chaq wab chenHa'moH neH jatwIj?

'a DaHjaj DIvI' Hol vIjatlhtaHvIS «your wing» (tellIj) jIjatlh 'a «my wing» (telwIj) vIDel 'e' vIHech. (DopwIj tel vIDel -- tel vIghajbe'). rarHa''a' yabwIj? jIH latlhpu' je vIchevlaHchu'be''a'?

# 23:00 lab Qov

2004-06-24

Nacelles of Desire qon Kerensa Ravenwing 

nuv pong chenmoHmeH mIw vIQullI'. wej qechmeywIj vImuchrup 'a chovnatlh vImuch vIneH. lut per vIleghDI' qID 'oH 'e' vItulqu' 'a vIlaDchoHbe'laHbe'.

neHqu'ghach HanDogh qon Kerensa Ravenwing

qonwI' pong ngebmo' qab lut net Sovchu'. 'a murI' qabqu'ghach. vISIQ vIneH! lut Daq vISuch. wa'maH loS ben boghpu' qonwI' net maq. qabchu'ghachvaD jISIQrupchoH. lut vIlaDchoH. chaq qID 'oH. qID 'oH 'e' vItulqu'. 'a vIHarbe'. qechmeyDaj QummeH mu'mey qonlaw' nuvna'.

cha' mu'tlhegh vISIQ. bolaD tlhIH boneHbe'qu'bej. DIch vIghaj. SaponmeH mu'tlhegh cha'DIch vI'ang. mu'lhegh cha'DIch 'oH. mu'tlhegh wejDIch vIlaDbe'ta'.
The doors had barely swished shut when Spock slammed his Captain up against the starboard nacelle which, was throbbing and pulsating just like his own desire-filled green protrusion.
SaqaD. tlhIngan HolvaD mu'tlheghvetlh yImugh. ngaghwI' lut qab DIqonmeH tlhIngan Hol wIlo'laHchu'meH pulsate throb joq mughbogh mu' DIpoQlaw'.

cha' Hu' Parseltongue vIQultaHvIS ghargh ngaghwI' lut vItu'. chunbej mu'tlhegh cha'DIch 'a vemchoH DujwIj: Sut Delqu'mo', 'Iqmo' DelmeH mu'mey, motlhHa'mo' ghu'mey ngaghwI' lut 'oHlaw' SIbI' 'e' vIpIH.

# 00:14 lab Qov

2004-06-23

van lachlu'bogh DItam 

qen 'or 'e' ghoj neHbogh be''e' vIqIH. Ольга ('olqa) 'oH pongDaj'e'. not 'orpu' 'a matay'taHvIS mapuv. 'or ghaH 'e' vIchaw' 'ej Saq ghaH je. pupbe'ba' SaqlI'ghachDaj 'ej SaqtaHvIS vIboQ 'a <<majQa'>> jIjatlh. <<pov!>>

ghIq, muD Duj vIbaghtaHvIS, roSIya' Hol jIjatlhchoH. pupbe'mo' roSIya' HolwIj jItlhIj 'a jatlh Ольга <<pup!>> pupbe'ba' 'e' vISovmo' jImorghmeH nujwIj vIpoSmoH 'a SIbI' vISoQqa'moH. noD Ольга.

HaghtaHvIS Hoch bortaS jablu'DI', reH QaQqu' nay'.

# 10:06 lab Qov

2004-06-22

SSSSSSSSSSS 

Harry Potter much Daleghpu'chugh qoj paq DalaDpu'chugh, ghargh Hol jatlhlaH Harry 'e' DaSov. muchvaD HolHey 'oghlu'law'ta'.
Chris Columbus: We essentially invented a language for Parseltongue. We dealt with a linguistic expert from Oxford University, and I discussed with him the sound and the feeling I wanted to get out of Parseltongue. He went back and created an alphabet for Parseltongue, enabling us to translate any English phrases into Parseltongue.
Chris Columbus: ghargh HolvaD Hol'e' wI'ogh. Oxford DuSaQ'a'vo' nughoS HolQeD po'wI'. maja'chuqtaHvIS ghargh HolvaD wabmey, qech je vIneHbogh vIDel. chegh 'ej ghargh HolvaD wab 'oSmeH pat chenmoH. 'oHmo' Hoch DIvI' Hol mu'tlhegh DImughlaH.
vaj wabmey neH 'oHlaw' Parseltongue'e'. togh Hol Daqvam 'a pab, mu'tay' je qelbe' De' Daqvam.

# 23:58 lab Qov

2004-06-21

QubmeH Hol 

juHwIjDaq HaSta vIbejtaHvIS SeHlaw mach vIghaj. TiVo leQ vI'uyDI' much tetlh vIlegh. much vIbej vIneHbogh vIwIvmeH select leQ vI'uy. vI'uyDI' «wIv» vIQub DaHjaj 'e' vItlhoj. vIQubmeH tlhIngan Hol vIlo'. ghaytan ngajmo' tlhIngan Hol mu' 'ej ngajmo' je 'uymeH Qu' wIv yabwIj.

# 21:23 lab Qov

2004-06-20

Hol Do 

yaHwIjDaq majatlh jIH, latlh ghojmoHwI' (C vIpong), ghojwI'Daj je. Koreangan ghaH ghojwI''e'. Dubbejpu'mo' ghojwI' jatlhmeH laH, yajmeHlaH wInaDlI'.

jIjatlh: pImqu'law'mo' HollIj wabmey, DIvI' Hol wabmey je QIch QaQ DaghojmeH Qatlhbej Qu'.

jatlh C: Qatlhbej ponglIj cha'DIch vIjatlhmeH Qu'.

ghojwI'vaD jIjatlh: ponglIj cha'DIch yIjatlh.

CvaD jatlh ghojwI': yIjatlh SoH

pong jatlh C. nap pong. jatlhmeH wa'logh tlhuH vo' vay'. DIvI' HolvaD novbe' wabmey.

qarmoH neH ghojwI'. jatlh: DanI'moH. ngajnIS. ngaj HochHom mu'maj. DajatlhtaHvIS DangajnISmoH.

jIjatlh: vaj moDbe'mo' vay' QIch nov Daghov'a'?

jatlh ghaH: HIja'.

pay' Korea DIvI' Hol QIch vIyajchu'. jatlhtaHvIS moD. jatlhtaHvIS ghojwI'vetlh pe'vIl mu'mey vo'. jatlhlaw' "prmer lockd ... cntrls nrmal ... mxrrich ... crbht cold" QIchDaj chut lob 'e' nID. QIchDaj Domo' wabmey qar lInglaHbe'.

ghaytan ghaHvaD QIplaw' DIvI' Hol Do.

# 19:32 lab Qov