bo logh

DaHjaj po Ho'Du'wIj Hab vISay'moHtaHvIS loDnalwI'vaD jIjatlhchoH. wuSDu'wIj botmo' Ho' Say'moHwI' QIch qar vIlo'laHbe'. wabmey pIm vIwIvnIS. muQubmoH ghu'.

wuS Dalo'laHbe'taHvIS DajatlhlaH. a e i je DajatlhlaHchu', loQ Huj o u je 'a yajlu'. b p f v m r DajatlhlaHbe'. nuq Datam? tammeH vay' wIvbe'law': jatlh neH. wIv nIv wIv'a' vay'? wIv rap wIv'a' Hoch DIvI' Hol jatlhwI'? wIv rap wIv'a' nov Hol jatlhwI'?

tlhuptaHvIS vay' nIbchoH b p je, H gh ch j je, je 'ach mayajchoH. De' Hutlhbogh tlhupbogh QIch SImlaw' yabmaj 'ej ghu' ma'laHlaw'.

qechvam vIQIjchu'meH IPA vIpoQ, 'a wej IPA ghItlhmeH pat vIghaj.

muHIvlI' Hoghvam.

jaj wa'DIch yavDaq muD Duj chIjtaHvIS ghojwI'wI' latlh muD Duj tel qIp muD Dujmaj tel.

jaj cha'DIch mobtaHvIS ghojwI'wI' mIch tuchlu'bogh 'el 'ej latlh Duj tlhe'nISmoH ra'wI'.

jaj wejDIch Duj Segh chu' vI'or vIghoj 'e' vInID 'a jItlhIblaw'.

jaj loSDIch 'orwI' puvmeH laH vInuDtaHvIS Qap 'e' mev QuQ, SoQchu'be'mo' wa' SeHlaw leQ.

jaj vaghDIch HeH potlh juS ghojwI'wI' SaqtaHvIS latlh Duj.

DaHjaj cha' ghojwI'vaD Boeing Field ghoSmeH mIw vIghojmoH vIneH 'a SeattleDaq ghaHmo' George Bush'e' wIghoSlabe'. (<<jajwIj 'arghmoH George Bush jay'>> jIjatlhlaH 'a jImobbe'bej).

jIbeptaHvIS muQuchmoHmeH jatlh vay' <<'arghmoHlaHbe' ghu'>>. Do'Ha' muD Duj qelmo' ghu'wIj reH 'arghlaH.

wa'maHleS qanaDaDaq DevwI' chu' luwIv roghvaH. 'ovwI'pu' DIwIvmeH SoQmey jatlh chaH. qanaDaDaq SoQ jatlhtaHvIS DevwI' rut qaStaHvIS wa' mu'tlhegh Hol choH. DIvI' Hol, vIran'eS Hol je jatlhlaH 'e' much neH. qanaDaDaq neH qaSlaw'. wa'logh ngoDHeyvetlh vIlaD.

DaHjaj po munuD Ho' Qel. pIv Ho'Du'wIj 'a loQ lam. rInDI' nuDlI'ghach Ho' Say'moHmeH SIrgh munob Qel boQwI'. SIrgh ngaSwI' vInuD. chenmeH SIrghvam nap jeSlaw' wej puH: DopDaq MADE IN IRELAND ghItlhlu'. perDaq Oral-B Laboratories Iowa City, IA ghItlhlu'. (Daqvetlh DaSuchchugh vagh Hol DawIvlaH, 'a tlhIngan Hol Hutlh tetlh). Iowa Quv bIngDaq Mississauga, ON ghItlhlu'. wej puH. SIrgh 'oH. wejpuH.

DaHjaj po tlhegh vIghItlh 'a DaHjaj ram pay' qaq SIrgh 'e' vIqawmo' vIchoH.

qaStaHvIS wejmaH jav DIS HolwIj vIjatlhtaH 'ej vIQoytaH. HolvaD nI'be' poHvetlh 'a choHpu' HolwIj. notlhchoHpu' mu'mey. chenpu' mu' law'. 'ej choH mu' law'. choHDI' mu', Daj 'a rut yoychoH mu'. muvuQ wanI'vetlh.

candidchugh vay' jatlhtaHvIS pagh pegh. yuDHa' ghaH.
«So you're quite candid about this?»
(DaqeltaHvIS bIcandidbej'a'?)
«Not at all. I'm being perfectly honest.»
(ghobe'. jIyuDHa'chu'lI'.)

candid jatlhDI' ghaH yoychu' mu'.

yoychoHghachvam mung vIngu'laHlaw'. HaSta much Candid Camera chenmoHlu'. muchvaD vay' lutoj lIngwI' 'ej ghu' yaj 'e' nIDtaHvIS bechwI', wanI'mey qon So'lu'ta'bogh HotlhwI'. yuDHa' qonbogh jan 'e' maq per, 'a chay' pIm janvetlh? So'lu'ta'. So' qonbogh jan 'e' luqawmo' bejwI', 'ej qubmo' mu' candid So' 'oSchoH mu'.

yoychoHpu' je camera. wa'logh Hurgh, So'lu'pu' joq 'oS camera. qonbogh jan 'oghlu'DI', jan qoDDaq Hurgh.

ja'chuqtaHvIS ghom, in camera chaHchugh pegh. 'a on camera chaHchugh bejlaH Hoch. vaj in camera yajHa'lu'.

ben peghHa' candid 'a peghchoH. ben pegh camera 'a peghHa'choH. Candid CameravaD tay'mo' mu'meyvam yoy ghu' vItIv. QIpwI' vaqmo' Candid Camera much vItIvbe'.

DochHa'ghachqoqvaD qechna' jun DIvI' Hol QIch net Sov 'a DaHjaj mIw Daj vItu'.

DaHjaj QapHa'law' vay' QumwI'. ra'wI' nuQchoHmo' ghu', qejchoH. jatlh, "Someone on ground is clicking a microphone. If you could quit that, please." (QumwI' chu'qa'law'taH yav Se' lo'bogh vay'. DabuplaHchugh [please]).

mu' please yIqel. mu'vam lo'be' tlhIngan Hol vaj vIDel. vImughnISchugh <bel> jIjatlhnIS 'a <Dubelchugh> 'oS. DochHa'meH vay' jatlh'a' <yIta' Dubelchugh>? ghobe'. DIvI' Hol DajatlhtaHvIS, bIra'DI' bIDoch. bIchupnIS.

vaj Dochlaw'mo' <yIbup>, <DabuplaHchugh> jatlh. rInbe' mu'tlhegh. <DabuplaHchugh qatlho'> 'oS.

DochHa'law' <-chugh>. Daj.

wa'Hu' ram lojmo' Sojmaj Qe'Daq maSop jIH loDnalwI' je. Soj QonoS 'oHbe' QonoSvam'e' vaj qatlh Qe' vIqel? maSoppu'DI' wIbHa'wI' nunob jabwI'. wIbHa'wI' qatbogh navDaq mu' ghItlhlu'. Euχαριστω vIlegh.

Holvetlh vIyajbe' 'a QeDmo' pIqaDvetlh vIlaDlaH. muHaghmoH mIw. α σ je vIghovba' 'a vIlaD vInIDDI' nIS pongmey, QeD 'oSbogh je. wab 'oSpa' ω tajvaj Do 'oS. QeD vIbuSchoHpu'DI' vIlaD 'ej mumer. Eucharistu 'oH. 'a mu'vetlh'e' vIghov. loDnalwI' lalDanvaD tay 'oH. ghIq navDaq latlh mu'mey mach vIleghchoH. Euχαριστω DungDaq thank you ghItlhlu'.

DaHjaj jIHvaD chIrghDaq ghel loDnal 'ej ngerwIj 'ol. qa-/Satlho' 'oS Eucharist. lalDan cherwI' pong rurmo' Eucharist, ghaH 'oS 'e' vIHarpu'. DaH mu' nap 'oH 'e' vISov.

'ey je souvlakimaj.

Cannes jIHtaHvIS nuv juH vIDab. wa' ram jIQonglaHbe'taHvIS, paqmey tlhaQ vIlaD.

Le Genie des Alpages 'oH per'e'. qon F'Murrr 'ej tera' DIS wa'SaD Hutvatlh SochmaH jav maq Dargaud Canada.

Ha'DIbaHmey QorghwI'chaj je qel paqmey. wIgh 'oH wa' sheep -- pong genie 'oH 'a val je Hoch sheepmey dog je. Daj lutmey 'a DIvI' Holqoq jatlhchoHDI' wa' SuchwI' muqImmoH. pIj nov Hol jatlh vay' 'e' 'oSmeH ghItlh, Hol qal much. chovnatlhvam vImuch:

DIvI' Hol mu' qubHa' lo' 'ej DIvI' Hol pab lo', vIran'eS Hol mu'tay' choqtaHvIS.

"THE SHETLANDS SONT OF MONDIAL REPUTATION"
DIvI' Hol mu' of lo'lu', de pIHlu'DI'.

"J'AI PROMIS A COUSIN MAC LAC DE L'ACUELLIR WITH MUSIC"
DIvI' Hol mu' with lo'lu', avec pIHlu'DI'.

"J'APPRÉCIE BEAUCOUP LE CALME DE VOS ALPAGES AND YOR PRECIOUS POTITES BESTIOLES À LAINE"

DIvI' Hol mu' rurbogh yor'e' lo'lu', vos pIHlu'DI' 'ej sheep luDellu' -- luponglu'be'.

"ET I SOUHAITE LUER ETRE PRESENTED"

mu' I 'ej DIvI' Hol pab: -ed chellu'.

"YOU NE SAISISSEZ POINT MON PENSER"

You lo'lu'.

paqmey DelmeH DIvI' Hol lo' Daqvam