bo logh

DaH qaSlI'chugh vay', wanI' Delbogh wot Segh le''e' ghaj DIvI' Hol, tlhIngan Hol je. chovnatlhvam tIqel:

I am eating
jISoplI'

'ach vIran'eS Hol Dajatlhchugh qechvetlh le' DaDelmeH latlh mu'mey DachelnIS. wot nap Dalo'chugh qech Sar 'oSlaH.

je mange = DaH jISop, DaH jISoplI', DaH jISoptaH, roD jISop, joq

SoplI'ghach 'oSmeH je suis en train de manger jatlhlu' 'a wot Dajatlhpa' en train de DachelnISba'. vaj wot wIjatlhtaHvIS qaSlI'ghach wIQIj wIneHchoHchugh DuHbe'. latlh qechmey 'oSbogh mojaqmey DIjatlh 'e' wInID je. QanqorvaD jIHvaD je qaS SengHomvam. mu'meymaj vIqawchu'be' 'a mu'tlheghmeyvam rurqu'.

jIH: nav vImangechoH
ghaH: jImangetaH

jIHvaD Dajqu' Hol law' jatlhmeH mIw. chay' bIH chav pagh DuD yab? mIw lu'ang'a' Qaghmey? chaq' jItlhIb neH 'ang. jISovbe'.

SONEW DaqDaq maQuj 'ej nuvpu'vaD muchmaj Holmaj je DIQIj. nagh beQ puS vIghaj.

'angghal, mInDaj tIbej!

qonwI' ghaHmo' 'angghal'e' ghaHvaD jatlh neHqu'. muchvaD qon 'a qen ghetwI' ghaH. QuvDaj mI'Daq joq Suqbe'mo' 'angghal wIvaq.

chaH 'emDaq Art be' je luleghlu'. wa'logh <qo' joH 'IH> ghaHlaw' be'vetlh. chaq <India joH 'IH> ghaH neH. vIlIj.

maqu'!

be'pu'vam vIqIHDI' QuchDu'vetlh tuQlI'. lulIHlu' SoS ghaH Carrie'e' 'ej puqbe' ghaH Sarah'e' 'e' vISov 'a SoS puqbe' je vIngu'laHbe'. Dangu'laH'a'?

megh SopmeH tlheDpu'DI' Sarah, QuchDaj vItuQchoH. ghIq Sarah mupongchoH Steve. Quchqoqmo' mughovHa'.

Qanqor volchaH 'em yIlegh

tlhoy' yIlegh. Qanqor cha' maqwI'. potlh ghaH jIjatlhta'! vumbej Qanqor. reH HIp tuQ 'ej bomqang.

HIpwIj vItuQqang, 'a not vItuQ 'e' mutlhobmo' SONEW loQ vImawlu'. tlhIngan HolvaD potlh yabwIj. jech vItuQchugh vaj jech lulegh nuv 'ej tlhIngan vIDalaw'mo' munuDbe'. Sut motlh vItuQchugh vaj jIHvaD jatlhnIS 'ej Hol vIQIjlaH.

Daqmaj luSuch nuv law' 'a much je'wI' chaHbe'. qaSpa' yupma' nabbe'law'pu' SONEW. maHvaD jey tu'lu'be'chu'. De' nobta'bogh Robin qImHa' Steve vaj yupma'vaD jeSrupbe'. loQ bep Robin, 'a QapmeH Hoq vumbej.

ram wa'DIch cha' rep jIvem 'ej jIQongqa'laHbe'mo' bom vImugh. vaj cha' Sung bom DIbom. QoQ lughovmo' nuqImchoH loSwI'pu'.



motlh <taHjaj wo'> mabom 'a latlh bommey DISov ...

Allouette
'alu'e'ta, quvbogh 'alu'e'ta
'alu'e'ta bolIj vIteqlI'
nachlIjvo' bolIj vIteq
nachlIjvo' bolIj vIteq
...
QuchlIjvo' je
Sa'Hutvo' je
qIvonvo' je
...

po 'oHmo' bomvam vItIv, 'a choH bom mu' Hoch poH wIbomDI', vIqawlaHbe'mo'.

loDnI' qeylIS
loDnI' qeylIS, loDnI' qeylIS
bIQong'a'? bIQong'a'?
chuStaH Hoch po 'Inmey
chuStaH Hoch po 'Inmey
DIng Dung Dong
DIng Dung Dong

yIH bom, 'Iv maH, bIngo' je DIbom. DaHjaj po wIbom wIneH 'a bom mu' DISovbe'.

Hoghvetlh CannesDaq quq cha' wanI'.

wa' - Palm d'Or tev HevmeH 'ov HaSta much puS. DISvam 'ov wa'maH vagh much. qaSpa' yupma' 'ovwI'mey wIv noHwI'. muchmey bej 'ej tIv nuvpu' noHwI'pu' je. paw nuv noy, letlh DoqDaq toS, megh luSop.

cha' - malja' Huq much Suy law'. muchmeychaj much 'ej ngev 'ej je'. jatlhchuq, Sutlh, 'ej maq'egh.

rarchuqtaH cha' wanI' 'ej qachmey rap lo'. rap jeSwI' law'. 'a pIm wanI'mey.

wanI' cha'DIchvaD majeS. vaj nuq wIta'?

po, poSpa' lojmIt 'ej loStaHvIS jeSwI', lojmIt tlhopDaq mabom luneH lIngwI'. 'Ij 'ej bej loSwI' 'ej chaHvaD much Del Robin. pa' cha'logh mabom 'a lI'qu'be'law'.

yupma' qoDDaq Daq DIlta' SONEW. pa' maba'taH 'ej QIj'eghtaH. pa' mabom, tlhIngan Hol wabmey DIQIj, nuvpu'vaD majatlh. roD cholDI' nuv, ghaHvaD jatlhchoH Robin, Alexandre, Young, Art joq. tlhIngan Hol Qoy neHchugh nuv, vaj tlhIngan Hol jatlh Qangqor jIH 'angghal joq. motlh Hagh 'ej mev nuv. pIj Dal.

rut qep wInuDmeH mayIt 'ej tlhIngan Hol wIjatlh. latlh muchmey DIvaqmeH tlhIngan Hol wIlo'. vaqmeH lI'bej tlhIngan Hol.

SONEW DaqDaq mavumbe'taHvIS, veng wInuD, pagh maSop, pagh maghIQ. tugh Soj, ghIQmeH 'eb, veng je vIDel.

ram rut lopno' wIghoS, rut maQong neH.

mISmoHmo' bo logh 'ISjaH vIlISHa'

wa'Hu' HaSta much vIDel. DaHjaj vIqel.

qabbe'. may. loQ qep'a' QIj 'a jup maHchoHpu' 'e' muchqu'be'. mu'meymaj lo'mo' yuDHa' 'a ghaytan par 'op.

Michael vaqmo' ghaH vIvup. vup je SONEW beq 'a ghaH parHa' je. «MichalvaD bang wISamnIS» jatlh Sarah 'ej Qochbe' Robin, Carrie je. tlhIngan Hol ghoj 'e' vIboQ vIneH. vIbejtaHvIS mu'oy'moH. bech ghaH vIneHbe'.

ngeDbe' Hol ghojmeH Qu' 'e' 'ang Michael. qen vay'vaD much vIDeltaHvIS «Hol patlh wa'DIch chav neH wa' loD ...» jIjatlhchoH.

qagh 'IjwI'wI'. jatlh «patlhmey tu'lu'bej'a'? SuSaghbej!»

mumer qechvam. maSagh 'e' vIQIj 'e' vIHar 'a patlhmey lutu'lu' Sovpa' Harbe'law'. tlhIngan Hol ghojmeH vay' buSnISlaH. mabuSlaH 'e' 'angbej. paintball buS DloraH. DaSmey buS Louise. rut vIbejtaHvIS mangotlhmo' jItuH. mamotlhbe'ba'.

'angghal nuQbej Michael Dorn. munuQbe'. jISaHbe'. Qat Dorn vuDmey. vuDvetlh 'ol 'ej qarmoH Worfqoq 'e' Harchugh vay' vaj tlhoch'egh. qatlh tlhoch'egh? lut bIHmo' tlhIngan QIpchugh tlhIngan Hol, vaj potlhbe' Worfqoq. potlhchugh Worfqoq vaj lut DaHarlaw', qarbe''a'?

VancouverDaq Eartlhings cha'lu'chugh jItuHbe'. Hoch muchbe', lachbej, 'a nepbe'.

qaStaHvIS cha' jaj much lubejpu' latlh 'ej wIbejlaH 'e' laylaHbe'. much bejmeH pa'Daq cha'maH quS, HaSta je tu'lu'. taghpa' muchmaj pa' HurDaq bejwI' DIloS. pawchugh cha'maH bejwI' much wIbejlaHbe' maH. paw vagh nuv 'ej bItqu' Alexandre.

Dumer much DaneHchugh QonoSHomvam DalaD 'e' yImev. wejlogh vIbejta' 'ej Hoch vIqawbogh vIDel 'e' vIHech.

taghDI' much, Hamlet SoQ jatlhlI' ghuy'Do' 'a nujDaj 'angbe' HaSta. mInDu' neH leghlu'taH. qaStaHvIS wej tup jatlhtaH. Dalmo' mej nuv puS. bertlham jatlhtaHvIS paw latlh nuvpu' 'ej SoQ SIQnISbe'mo' mabel.

nI' je pong tetlh 'ej qIj jIH pongmey lucha'lu'taHvIS. tagha' tagh muchna'.

jatlh nuv puS. luyu'lu'pu' 'a not yu'wI' Qoylu'mo' jatlhlaw' neH.

Hol, nughmaj Del 'angghal. chu'be' qechmeyvam. jatlh tlhIngan Hol yejHaDvaD pupmo' laHwIj, yejHaD vIlonlaHbe'.

jatlh Marc Okrand. jatlh ghuwIj 'oH tlhIngan Hol'e'. nenchoH Hoch ghu 'a wej vIlonrup. choHtaHmo' Hol, DaH taHmoHmeH mIw vIwIvlaHbe'. nuq poQ Hol, vIlonnISDI'?

muchvaD potlhba' taHjaj wo'. bom Qanqor, lubom ghunchu'wI' ghungchu'wI'qoq je, jatlh 'ej mugh Andrew. bom Hoch 'ej jatlh Qanqor: pup! pov!

(wa'logh neH ghunchu'wI' ghungchu'wI' je DIlegh, bomtaHvIS. jIHvaD jatlh Alexandre pujmo' ghunghchu'wI' (pongvetlh lo'taHbe' 'e' vISov 'a wej nenmo' pongna' vIlo'be') ghogh, Do'Ha' lo'laHbe'.)

jatlh Michael Dorn. jatlh "All I know about the Klingon Language Institute is that it exists . . . somewhere."
jatlh: jIHeghDI' Hegh tlhIngan nugh.
jatlh: wa'logh tlhIngan Hol raQ vIghoS net tlhob 'a muDech chaH vIneHbe'. ghaytan Worf jIHmo' luparHa'. <jIHvaD Qo' jatlh ghaH!>
Hamlet wImugh 'e' Sov 'ej Hamlet wIquvHa' 'e' Har, yapbe'mo' cha'SaD vaghvatlh mu'.

jIjatlh jIH: Hamlet mughlI' tlhIngan Hol yejHaD 'e' vISovchoHDI' yapbe' mu'tay' 'e' vIHar 'ach DaH mu'tay'vetlh vIra'laH jIH . . . yapbej. 'IHbe'bej Hol jIjatlh 'ej chu'wI' HughDaq 'oy'moH, 'ach DajatlhlaHchu'chugh Hugh 'oy'moHbe'. jIjatlh: yabwIj vIwoDbe', yabwIj vIjejmoH 'a jIjatlhtaHvIS jIQagh 'ej bong cha'logh <yablIj> jIjatlh. qechwIj yaj 'ej mugh Seqram vaj muj mu'mey Sovbe' Alexandre. munuQ Qagh 'a rut yIH ghom Hoch.

jatlhtaHvIS Seqram Hol Del 'ej 'IH qechmey. maQumDI' yabDaq
qechmey DIQay. maghItlhchugh potlhbe' poH, chuq joq - DIQaylaHtaH.

paintball Del DloraH. paintballvaD QummeH tlhIngan Hol ghojchoH DloraH. DloraHvaD lalDan rurlaw' paintball. po'qu'qu' ghaH 'ej 'ovtaHvIS narghHa'laHlaw'. tlhIngan tIgh qel je: "Good Morning" jatlh 'e' tIvbe' DloraH. jatlh DloraH not puH novDaq jIjeng vaj tlhIngan Hol jatlhwI'mo' tera' tIgh vIqIHpu'. jIHvaD Saghqu'choHpu' mu'meyvam, DaH 'ayraqDaq ghaHtaH DloraH'e' 'e' vISovmo'.

jatlh Louise Whittey. DaSmeymo' ghaHvaD Daj Hov leng. DaSmey waqmey chenmoH ghaH 'ej qIrq HoD DaS parHa'qu'mo' ngevmeH chenchoHmoH. DaSmeywIj je' 'Iv? 'e' SIv. chaq tlhIngan Hol lujatlhbogh nIpponya'ngan chaH je'wI'wI''e'! tlhIngan DaS parHa' je. HomwI' roSwI' je jojHeyDaq chevlu'mo' lem rur.

jatlh 'ISqu'. nov ghaH 'a qep'a'Daq nov ghaHbe'law' jatlh.

muchvaD potlhqu' Qanqor HoD. pIm Qanqor Rich je 'e' Del. Qat taHjaj wo'. Hello Goodbye je jatlhbe'meH Qatlh Qu'.

Michael Oetting - Hov leng parHa'qu'. tlhIngan rur neHmo' jech tuq, Hol ghoj, tIgh pab. magh bangDaj 'e' Del. <romuluSngan ghaH jay'> Hol patlh pach wa'DIch baj neHqu'. HaDqu' 'a luj.

puqloDDaj Del Holtej ('ej bom puqloD 'e' wIQoy). Dun Holtej QIch, QIchwIj vIDubnISmoH. bagh neQ qID QIj.

jaj wa'DIch wIbejtaHvIS QapHa'choH cha'bogh jan 'ej much Qaw'. wanI'vammo' much lISlu' 'ej Hamlet luwoD. HamletvaD tlhIngan ngaghmeH tay Delbogh Michael Dorn tamlu'. joQDu' ghorbe'chugh Data'Ha' jatlh.

'ay'mey law' vIqawlaHbe'law' vaj Hoch vIDelbe'ta'. vIqawDI' vIDelqa'.

tlhogh tay vIbejmeH DaHjaj CaliforniaDaq jIHtaHmo' QonoS vIqonbe', 'a wa' mu' vImuch vIneH. San FranciscoDaq wa' mu' 'oH crabstand'e'. tera' pIpyuS ngevbogh Suy 'oH crabstand'e'. chut QIjbogh maqwI'Daq mu' vIlaD vaj vIboS.