bo logh

wa'Hu' much vIbejtaHvIS jatlh tej «We just came from a big conference on Mars». yajchu' 'IjwI'. yuQ Doq qelbogh qep'a' qel jatlhwI' 'e' wISov 'a roD yuQvetlh ghoSbe' Human 'e' Sovbe'chugh 'IjwI' yajHa'laHbej. mumonmoH.

vaj DIvI' HolvaD nIb mu'tlheghmeyvam:

qen Qo'noSDaq qep'a' tInvaD majeS.

qen Qo'noS qelbogh qep'a' tInvaD majeS.
mISlaH Hoch Hol. yepnIS jatlhwI'. wa'logh jatlh HoD <take off power>

DIvI' HolvaD cha'logh yajlaH vay':

puvchoHmeH HoS [yIchu']

pagh

HoS yIchu'Ha'
wIv wa'DIch yaj yaS wa'DIch. Hegh vagh vatlh nuv. (nItIb chach qaSmoHbe' mu'tlheghvetlh. ghaq wanI' law').

tlhIngan Hol yejHaDvaD Peter L. Berger, Thomas Luckman je secondary socialization (nugh ghojmoHghach cha'DIch) nger qel Wahlgren. puqvaD qo' muchmo' SoS vav je, nugh chut ghoj puq. qo''e' moj chutmey vaj nughvaD jeSmeH nenwI' wIvnISbe'. Saghqu'choHpu' chutmey 'ej bIH wuv nugh naQ. nugh lulIngta' nuvpu' 'a chaHmo' taH. latlh nughHom muvDI' vay' ghojmoHghach cha'DIch SIQ. tlhIngan HolvaD bIpotlhmeH DulajnISmo' tlhIngan Hol yejHaD ghojmoHghach cha'DIch SeH tlhIngan Hol yejHaD. Luckman Berger je mu' Dalo'chugh institution 'oH tlhIngan Hol yejHaD'e'.

nulajmeH tlhIngan Hol yejHaD, yejHaD qechmey DIlajnIS. tlhIngan Hol yejHaD wIwImuvpa' qechmeyDaj DIlajba' vaj nuraD pagh, 'a wISIghlu'ba'. tlhIngan Hol potlh law' <Hov leng> potlh puS 'e' maq yejHaD. maHeQ. ponlaHbej yejHaD. vImorghbe'lI', wanI' vIDel neH. Delqu'be' Wahlgren 'a chovnatlh puS tu'lu'. jatlh Jennyqoq «Grammatical accuracy seems to be viewed as far more important than fluency» («chaHvaD pab qar potlh law' jatlhchu'ghach potlh puS») 'ej wanI' Del. mu'tlhegh naQ jatlhDI' ghaH qarmoH 'e' nID po'wI'. Jennyqoq HIvlaw' vay' 'e' vIpay (chaq vIHIv jIH jIghov'eghlaw') 'a jIQochbe'.

Holmaj 'oHbe' tlhIngan Hol'e'. wIHaD neH. wIchoqmeH maDughqu'nIS. pupchoHpu'DI' tlhIngan Holmaj Domaj wIghurlaH. laH QIv wIchungmoHchugh, Dap wIchenmoH. Do'Ha' wa' 'ay' wIbuSHa'. jatlh Irwinqoq «Many skilled Klingonists don't know that their pronunciation stinks». muDelchugh qarbe'. DunHa' QIchwIj 'e' vISovchu'. Holtej QIch vIHo'qu'. QaQ je Seqram QIch 'a moH Qov QIch. chaq QIchwIj vIqarmoHmeH DowIj vImachnISmoH.

DaHjaj qaS qanaDa qoS, vaj qanaDa Sung Hol vIqel vIneH.

DaHjaj vengwIjDaq jIyIttaHvIS qa'vIn ngevbogh malja' chu' vItu'. Darryl's Coffee Shop and Native Art 'oH. Darryl wIqIH 'ej Daj ghaH. Nass bIQtIq mIchvo' ghaH. vaj Tsimshiam ghaHlaw'. vItuHmoH vIneHbe'mo', Sung Hol jatlh 'e' vItlhobbe'. chaq Hol ngo' jatlhbe' puq poHDaj, 'ej potlhbe' Holvetlh 'e' qelchugh chaq vItIch.

DaHjaj De'vam vItu'. vengwIjDaq Sung Hol jatlh wa'maH Soch vatlhvI' 'ej potlhqu' Hol pagh potlh Hol 'e' Har vaghmaH chorgh vatlhvI'. Darryl vIghomqa'DI' vItlhob. Do'Ha' moH Hewmey nagh beQmey je ngevbogh Darryl 'a yIjatlhQo'.

Darryl malja'Daq tIr Soj wISop (Bannock ponglu') 'a 'eybe'. qanaDa Sung Soj 'ey DaSop DaneHchugh vaj Liliget Feast House yISuch. pa' pov Soj.



jaj vIlopmeH mIvHom Dogh vItuQ.

ghItlhDaj permeH Yens Wahlgren «Hol Sup 'oH tlhIngan Hol'e': wa'maH Hut tlhIngan Hol po'wI' nughQeD» lo'. (mugh ghaH'e'.) nuq 'oH Hol Supvam'e'? Pierre Bourdieu nger lo' Wahlgren. HuchQeD mu'tay' qech je ngIp Bourdieu nger. vay' DIlta'chugh Suy, lo'laHtaH Dochvetlh neH Suy. vaj lo'laHghach choqmeH vumqang Suy. rut Doch'e' SaHbe' Suy. targh chorDu' SaH'a' Suy? targh chorDu' je' luneHtaH latlh 'e' SaH neH. jo' lo'laH Daghajchugh vaj bImIp 'ej nIvuv latlh. roD jo' wIqelDI' Huch Dochmey je DIqel 'a ngervamvaD jo' bIH je qechmey laHmey je. tlhIngan Hol wIghojta'mo' vumta'ghachmaj wIQan wIneH 'ej tlhIngan Hol lo'laHghach wIghur wIneH. jatlh Wahlgren «The better your Klingon is the more linguistic capital you have.» (nIvchugh tlhIngan HollIj, law' Hol SuplIj)

lo'laHmeH laHlIj, Suy Daq qar DaSamnIS. ngotlhchu'wI' ghomvaD Daj tlhIngan Hol 'a lo'laHbe'. Duj Suy DaqDaq Sargh Dangev DaneHchugh Huch nIv DaHevbe'. Sargh Suy DaSamnIS.

Dajqu' qech. not HolvaD, tIghvaD joq qechvetlh vISovpu' 'a muyu'DI' Wahlgren qech nIb vIlo' jIH. jIjatlh «And now that [tlhIngan Hol] has been a part of my life for sixteen years, it seems silly to pull out that investment.» (DaH qaStaHvIS wa'maH jav DIS yInwIjvaD ghaqpu'mo' [tlhIngan Hol] Huchqoqvetlh vIlanpu'bogh vIlonchugh jIDoghlaw'.)

qechvetlh vIlajbej. ngochmaj woQmaj je QIj. majatlhmeH neH jatlhwI' chu' wInej 'e' wImaq, 'a maDoghchu'be'meH je mavang 'e' vIchIDnIS. potlhchoHDI' tlhIngan Hol mapotlhchoH.

nger 'oghpu'chugh tlhIngan ghaytan Suy DaqvaD che'ron tam. Hol yervam wIDan 'ej maDoH wIneHbe'mo' ngaq wItaHmoH. 'a Bourdieu nger 'oH.

# 23:08 lab Qov

CannesDaq muchmaj wImaqmeH maSuv tlhIngan Hol yejHaD Troma je. Toxic Avenger chenmoH Troma.



mamI' 'e' wInab vIneH 'a nablaHbe' vu'wI'pu'ma' maSuvnISpa' ghommeH 'eb lutem. jatlh «pecholchuqQo'. peQam 'ej pejach neH»



maqIpchuqbe' 'a maSuvlaw' wIneH. wa' nuv vISuv jIH. Sergeant Kabukiman NYPD 'oHlaw' pongDaj'e'.



jIHvaD nagh beQmeyvam lab Earthlings much chenmoHwI' SONEW. cha' jar pIq much luleghlaH 'amer'I'ngan.

wej jar ret tlhIngan Hol jatlhwI' QulmeH Yens Wahlgren nuyu'. DaHjaj ghItlhDaj mulab Yens. «Hol Sup 'oH tlhIngan Hol'e': wa'maH Hut tlhIngan Hol po'wI' nughQeD» ponglu'. vIlaDta' 'ej vItIv. QonoSHom puS baj ghItlhvam 'ej wej vIpojchu'ta'. DaH De' ngo' vImuchbe'pu'bogh vI'ang.

nuQultaHvIS Yens Wahlgren loQ QulwI' vIQul jIH.

Hov leng ngotlhwI' ghomvaD jeS, 'ej latlhpu'vaD tlhIngan Hol Del 'ej ghojmoH 'e' nID. cha'DIch DalaDchugh 'IqIya'ngan HolvaD «jIHvaD wa' HIq yInob» DamughlaH 'e' Daghoj.

Klingonska AkademienvaD ghaq. yejHaDvetlh cher'a' ghaH? cherlaw' Zrajm C. Akfohg.

naDev DaleghlaH. charghwI' 'emDaq pagh retlhDaq je Qam.

tlhIngan Hol jatlhbe' 'e' maq 'a Poe mughmeH jInmolvaD jeSlaw'. toH! tlhIngan Hol yajbe'chu'be'. laHDaj lachHa'law'. maj. Qatlh Hol 'e' yaj.

Lunds Universitet Sociologiska InstitutionenDaq HaD.

SaHtaHvIS SuchwI' law' ghu' vIlo' vIneH vaj nagh beQ vImuch.

Earthlings wImaqtaHvIS, CannesDaq maHtaHvIS wa' jaj Doy'qu'mo' Qanqor, Suy Daq tlheD. tugh megh vISopmeH jItlheD je jIH. megh vISammeH bIQ'a' HeHDaq jIyItchoH. pa' Soj Suy law' lutu'lu'. jIyIttaHvIS, Qanqor vItu'. Huch bajmeH bom ghaH. DIvI' Hol jatlh jupHeyDaj.



SONEW much vIcha'chugh vaj tlhIngan Hol yejHaD vIcha'nIS je. qep'a' vIghoSmeH muboj 'angghal. ghaytan vIDIl 'a' vIghoSbe'. bo logh laDbe'law' 'angghal vaj DupwIj Sovbe' tlhIH Satojbe'taHvIS.

DaHjaj law'qu'choHpu'bogh SuchwI'pu' meq vISam. bo logh maqchoH Blogger.

'ebvam vIjonnIS. HIQaH.