bo logh

cha'Hu' QulwI'vo' jabbI'ID vIHev. tlhIngan Hol jatlhwI'pu' Qulmo' muyu' neH. choHlaw'taH tlhIngan Hol 'e' HaD Yens Wahlgren.

reH muyu'DI' QulwI' jaS tlhIngan Hol yajlaw'. jIHmo' choH tlhIngan Hol 'e' Harlaw' Yens 'a vIchoHbe'. jIHvaD mu' puS 'oghta' Marc 'a Hol vIchoHbe' vIneHqu'.

jangmeH mIwwIj vIDel. Duyu'chugh Yens 'ej wej bIjangta'chugh, qaSIghbe'meH chaq QonoSHomvam DalaD DaneHbe'. 'ach Sara'be'bej: SaSIgh vIneH. QatchoHmeH vuDmeywIj ngong vISorghqang. yIlaD!

ghorgh bIboghpu'? be' SoH'a' pagh loD SoH'a'? nuqDaq rewbe' SoH? naDev Seghvetlh Dal vIbuSHa'. potlhba' qatlh tlhIngan Hol DaHaD? 'a motlh. cha'leS wejleS ghap vIqel.

chenmeH tlhIngan Hol, nuq potlh law' Hoch potlh puS?

wa'> ParamountDaq HaSta
muchchajvaD Qapla' nIv chavlaH Holna' 'e' tlhoj vay'. majQa'!

cha'> nuv lugh qIHmeH, bong Qe' lughDaq tu''eghpu' marq 'oqranD.

wej> paq Dun qon ghaH. Hol yajchu'wI'vaD Hol Delchu' 'ej not Hol HaDpu'chugh vay' HolDaj yajlaH.

loS> Qatqu' HaSta much <noD Khan> 'ej taHtaHmo' <Hov leng>, paq cha'DIch qonmeH 'eb ghaj marq.

vagh> tlhIngan Hol yejHaD chermeH 'angghal vumqang. marq tungHa' 'ej
maqmeH 'eb (HolQeD) nob.

DaH QummeH Humanpu' tlhIngan Hol lo'lu'. chay' tlhIngan Hol SIghpu'/choHpu' ngoDvam?

Human HughDu'vaD 'oghlu'ta' tlhIngan Hol. QaghtaHmo' ghetwI'pu', chaH lughqa'moHmeH marq, Hol lIS 'ej QIch Huj Del.

maQumbejmo' mu'mey chu' 'oghlu'pu'. qep'a'Daq, <ghal> 'oghlu'pu'pa', SengqoqwIj vIDelmeH muvetlh vIpoQ 'ej ngugh DIvI' Hol mu' vIlo'. ghIq mu' wIvmeH 'eb baj jupwI' 'ej muquvmoH: mu'vetlh wIv.

motlh mu' tlhobDI' vay', QummeH neH. rut latlh Hol ghItlh mughmeH neH.
rut reHmeH marq tlhoblaw'. (<vIn> vIqel).

neologismmey DaqelDI' nuq DaQub?neologismmey lajbogh HochHom tu'lu''a'? neologismmey lajbogh ghom mach tu'lu''a'? slang'e' 'oghbe'pu'bogh marq 'oqranD DaqelDI' nuq DaQub?

maHvaD chay' pIm neologism slang je? mu' ghoQ chaH. 'oghbe'chugh 'oqranD, slang bIHbej. pIj tlhaQ. rut lI'. vIchergh 'ach vItung. mu' ngeb lo'chugh vay' 'ej ngeb mu' 'e' Sovchugh Hoch, vIlaj.

chaq Yens vIyajHa'. chaq mu' 'oghDI' marq, neologism 'oH 'ej mu'qoq 'oghDI' jatlhwI' slang 'oH 'e' qel Yens.

DIp-DIp 'oHchugh 'ej yajlaHba'chugh Hoch vIlaj 'a DIvI' Holmo' qaSbe'nIS yajlaHghachvetlh. QatchoHchugh mu'mey DI'oghbogh maHemchoH 'ej QatmeH mu'meymaj ma'ovchoH vIneHbe'.

<Hamlet>vaD SutDI mu'qoq vIpar. jonmeH lojmIt 'oH law' DIvI' Hol Daqel, mu'vetlh Da'oghlaH, 'a lojmItvetlh Daveghpu'DI' Dujon, DacheghlaHbe'.

De'wI'meyvaD mu'mey chu' loQ vIlajqanglaw', Hoch jaj DIvI' HolvaD mu'mey chu' vIleghmo' 'ej vIlajmo'.

borgh, jabbI'IDghom je lajlaw' HochHom. yID, HIlel ghovlaw' HochHom. naDev bepbe' laDwI' mu'mey vI'oghDI' jIH 'ach QonoS nughDaq mu'mey 'oghtaH nuvpu'.

nI'choHmo' QonoSHomvam, wa'leS QummeH Humanpu', reH yap'a' tlhIngan Hol? vIjang.

wa'maH wejHu'  vIqelmeH lut vIqon. DaHjaj  vIHIv. Dap 'oH neH lutvetlh'e' 'a chaq mu'mey Daghoj DaneH je.

'ampaS 'avtaHvIS 'avwI' 'awje' tlhutlh. paw 'aj 'ej jatlh «'arlogh qajatlhnIS? 'ampaS 'ay'vam Da'avtaHvIS 'awje' Datlhutlh net tuch.» 'avwI' 'aQlo' mupmeH 'aj 'aqleH lo'. «'aw' 'aqleH 'e' DaHarchugh, 'arghlaH 'e' yIqaw. 'alngegh vIghaj je» jatlh 'aj 'alngeghDaj 'aghtaHvIS. cha' 'uj 'ab.

'a 'awje' tlhutlh neHmo' 'avwI', 'ampaS vutpa' ghoS. pa' vutlI' loD.
«naDev qa'avchoH» jatlh 'avwI'.

«lu'» jatlh vutwI' «'ach 'awje' Datlhutlh DaneH neH 'e' vISovmo' choboQnIS je. 'aqnaw yItlhap 'ej 'aDDu'vam tISIj»

vutpa' 'aH legh 'avwI' 'ej 'aqnaw wIv. «'aD 'ar vISIjnIS?» ghel

«'aqroS 'ang bargh» jang vutwI'.

vutpa' 'aH nuDqa' 'avwI'. wa' 'uj 'aD bargh 'ej cha' 'uj juch. barghDaq 'aDDu' lan 'avwI', 'awje' tlhutlhtaHvIS. bargh tlhap vutwI' 'ej 'atlhqam chel. ghIq qut na' qangchoH. qut na' law' lo'. bargh yuvtlhe' lanDI' 'aqroS Hot.

«nuq Data'lI' jay'?» tlhob 'avwI'

«'ajvetlh qejvaD vIvut» jang vutwI' «reH na'be' nay'mey 'e' bep»

yaj'a'?

qen jupvaD jIjatlhtaHvIS jIjatlh «Est-ce qu'on pegh'a' lengmaj?» Dogh mu'tlheghvetlh, 'a vIjatlhchoHDI' Cannes vIqellI', vaj Sepvetlh Hol vIlo', 'a roD nuvvamvaD tlhIngan Hol vIjatlhmo' choH Hol. motlh qaStaHvIS wa' mu'tlhegh Holmeyvetlh'e' choHlaHbe' vay', a' peghlaHmo' leng 'ej leng peghlaHmo' vay', bong Qap. pupbe' Qapla'qoq: cha'logh tlhob mu'tlhegh.

majatlhtaH 'ej jupwI'vaD Qagh vIchIDpu'DI' jatlh jupwI': «domagetaH». (DaH domageHa': jIQaghpu'be'. leng vIpeghnISbe' vaj naDev vImaqta'mo' qay'be'.)

Hol wISovHa'be'. cha' Hol jatlhlaHchugh vay' pIj DuD. cha' Hol quq jatlhbogh qorDu' qel lutvam.

pIqaD DalaDtaHvIS Dachchugh Degh puS, UTF-8 lo' Mozilla 'e' yI'ol. qen SoHvaD qay'chugh pIqaD, HISovmoH: qay'taH'a'? Qapchu' vIneH vIlo'qu'pa'.

Cannes

 Cannes .         .  :  .   ?

    .     . (    Earthlings (--) ). Alexandre Philippe (  -- )     Earthlings  .

rut Google vIlo'choHDI', DIvI' Hol lo' HochHom Daqmey 'e' vIlIj 'ej tlhIngan Hol vIlo'choH. Qaghqoqvammo' wa' jaj bong Jan's Liahona vItu'.

pay' Holvam lo'choH Liahona QonoSHomvetlh pong ghItlhDI', 'a qatlh? QonoS qonmeH DIvI' Hol lo'. lalDanDaj ghupu' nuQwI'pu' je qeltaH QonoSDaj. 'a qaStaHvIS loS jaj, tlhInganpu' qel, qoj tlhIngan Hol mu'mey lo' QonoSHom pong. tlhInganpu' tlhIngan Hol joq qelbe'chu' QonoS'e'.

chIch mu'meyvetlh wIvlaw'. HaSta much Survivor (yIntaHwI') mu'mey rur, 'ej pongmo' jaj qech loylaH vay' 'e' jatlh. DIvI' Hol mu'mey neH nejchugh tlhIbwI', vaj Hur neH tu'. nejtaHchugh, ghaytan wej H-mu'mey wIvbe'. (toH, wej mu'meyvam vIparHa': Qub, Quj, Qav. Qo'noSDaq qaSchugh Survivor vaj mu'meyvetlh lo'nISbej). tlhIngan mu'ghomDaq mu' Quj tu'lu' 'ej qIb lengwI'vaD tlhIngan HolDaq Hargh tu'lu'. vaj cha' paqmey, latlh Hal joq lo'. QaQ wIvDaj. loQ tlhIngan Hol jatlh Liahona 'e' vIloy.

nuv Daj ghaHlaw' Liahona'e'. Mormon lalDan Har 'ej yInDaj qel. lalDanvetlh jatlhwI'pu' DIghaj 'e' vISIv? toH, tlhoS SIbI' vISIv 'e' vImevlaH. tlhIngan Hol jatlh 'e' lutIvbej Mormonpu'. yIlegh, Mormon paq lumughlI'. pupbe' 'a tlhIbHa'. yIlaD.

1 Nephi 4:28 'ej muleghvIp laman lemu'el Sam je. 'ej SaHwIj Haw'pu'. laban jIH 'e' luHar, 'ej muHoHta' 'e' luHar 'ej 'e' yInmeychaj nge' neH je.

3 Nephi 11:3 'ej jatlhchuqtaHvIS ghogh Qoy' 'e' qaSpu'; 'ej chalvo' ghoS ghogh 'e' rur. Hal lunej 'ej ghogh'e' Qoy'bogh yajbe'; 'ej gheghbe' ghogh, 'ej chuSbe' ghogh; 'ach mach ghogh. porghmey Hoch QommoH. mach ghogh 'ach botlhDaq luQoy'bogh chaH DuQ, 'ej Qombe'bogh porgh Hoch taHbe'; HIja', qa'chaj DuQ, 'ej tIQDu' meQmoH.

tlhIngan Hol lughojlI' mughwI'pu' 'e' DaleghlaH. Dublaw' Hol, tlhetlhtaHvIS. mumonmoH wa' ngoD: «Dochmeyvam» vIwIvta'bogh jIH lulo' chaH.

Liahona ghaH'a' Beth'e'? pong ngeb lo' Liahona 'e' maq. cha' tlhIngan Hol paqmey ghaj Beth jatlh James. 'a ghobe', nIbbe'. jaS qon 'ej tlhochchuq lutmeychaj. chaq Sovchuq.

[mu' vIlo'Ha'pu'bogh vIchoHta'.]

QonoSHomvam DalaDmeH pIqaD DalaDnISlaH, pIqaD DajomnISpu', 'ej Mozilla 1.6 (nIvwI' ghap) Dalo'nIS. DaghojmeH Klingonska Akademie yISuch. DajommeH tlhIngan Hol yejHaD wiki yIghoS. naDev Mozilla tu'lu'.

    Unicode 10646-2.     .   Unicode   !  Catch-22  .          .

     .        . :         Roman  .  ;        .    !

     .

mI'mey ghojmoHmeH patvam 'oghta' vay'. Holvetlh jatlhbe'bogh nuvvaD Hujqu' pat. nuq bej ghojwI'? qastaHvIS tup puS mu' muj'e' buStaH. vIQuj jIH 'ej DaH mu'mey rurbogh Dochmey vIqaw 'a mu'mey bIHbe'law. DuDHa'choHpa' vIqawchoH. DuDHa'pu'DI' mu', vebwI' vIbuSchoH. 'ej mI' ngu'nISbe'mo' ghojwI' mu'mey ghojlaH, yajbe'taHvIS. latlh Holmey mI'mey rurmo' mI' puS chaq vIloyta' 'a latlhmey vIloylaHbe'. Sovvetlh vIghoj vIneHchugh vISamlaHbej, 'a mughojmoHbe' patvetlh.

ghojmoHmeH pat vI'oghchugh jIH, patwIj nIv law' patvetlh nIv puS.

jIqontaHvIS, HaSta much vIbejlI'. Qu' DeltaHvIS pIn, jatlh loD "If it's just east of the eightieth parallel and south of the twenty-fourth meridian, I volunteer." nuqjatlh?! jIyay'taHvIS jang be' 'ej Quvqoqvetlhmo' Caribbean ghovlaw'. ghuy'cha'. SIbI' Quv lughovmo' vallaw' chaH luneH qonwI'pu'. 'a HeDnIS HeDwI'mey tlhoj'a' pagh? chay' Qaghvetlh tu'be' qonwI'pu', ghetwI'pu', lISwI'pu' je?

Quv 20N 80WDaq Cuba (qu'ba) tu'lu', 'a jatlhHa'chugh neH ghetwI', nuq 'oH mu'mey qar? QIptaH "south of the twenty-fourth parallel and east of the eightieth meridian." loS Daqmey 'oSlaH. IranDaq ('ayran) qaSmo' Qu' Delbogh pIn qo' naQ qelnISba'.

mutIch muchvam. Quv pat yajbe'mo' qonwI', ram 'e' Harlaw', vaj Qulbe'chu''a' jay'? meridian parallel je jatlhchugh loD, yuQ Quv pat napHa' ghov bejwI'pu' 'a yajmo' pagh patvetlh vIlo'nISbejbe' 'e' Har'a'? vay' jatlhchugh much nuv, loQ QulnIS qonwI'.

QoylaHbe'wI' Hol vIleghmeH muchvam vIbejtaH 'a pIj QIp lutmey.

va. qatlh munuQ jIvwI'pu' HaSta vIbejtaHvIS? 'ejDo' tej chaHchugh, vaj 'ejDo' chenmoHlI' 'e' vIqawnIS.

British ColumbiaDaq HeghlI' Sung Hol puS. yIntaH Sungpu' 'a Holchaj jatlh 'e' mev. veng Dab Sung law' 'ej qaStaHvIS yIn naQ not Sung Hol jatlhpu'. not jatlhpu' je SoSchaj. 'ach DIvI' Hol jatlhDI', Sung QIch Qoylu'.

Dene Salish ghap jatlhlu'DI' HughDaq chen wabmey law' 'ej pIj S chellu'. 'utba' wuSDu' 'a nuj 'o'Daq chen Hol. DIvI' Hol jatlhDI' Hol jatlhwI' puq puq, ratlhlaw'taH SoSnI' QIch. Qel ghojmoHwI' joq ghaHchugh motlh QIch. mIpHa'wI'pu'vaD ratlh QIch. QIchvetlhmo' jIv chaH 'ej QIp 'e' luHar nuv puS.

Doyche Hol jatlhchugh vay', DIvI' Hol ghojpu'DI' ratlhbej Doyche QIch. 'a qanaDa DabtaHhugh puqDaj, DIvI' Hol QIch pup lo'. pImbe' Sungpu' HughDu'. pIm yInchaj. QIvmo' nugh patlhchaj mob Sungpu'. pIj latlhpu'vaD jatlhbe', 'ej murur luneHbe'.

qechvam vIpojmeH, vay' vIyu' vIneH 'ej QIchDaj vIqon vIneH, 'ach vengDaq pIj chech Sungpu'vam, pIj ral, vaj vIyu'vIp. mobbej chaH 'e' vI'agh.

QIch neH vIQoy jIH 'ach chaq ratlh je pab puS.