<$BlogRSDUrl$>

2004-04-17

jatlhchu'wI'qoq De' 

tlhIngan Hol qeltaHvIS George, togh'eghbogh jatlhwI'qoq meq Del « . . . simply being able to say one word (probably <Qapla'>) and glower ferociously . . . ». mo'vam qubHa' law' ja'chuqlaHghach qubHa' puS 'e' Har George.

Holna' 'oH 'e' luSovbe'chugh vaj laH chovHa'ba'. DaH vIyajchoH.

Чайник 

DaHjaj roSI'ya'ngan Hol qelbogh QonoSngan chu' vIlIH. Kate ghaH pongDaj'e' 'ej QonoSDaj pongmeH чайник (chaynIq) wIv. roSI'ya'ngan HolvaD чайникDaq Dargh HaHlu' 'a QIpwI' je 'oS mu'.

Daj HolmeyDaj 'ej qechmeyDaj. vIlaDtaH 'e' vIHech.

2004-04-16

jIbItchoH 

<Earthlings: Ugly Bags of Mostly Water> vIqelqa'. loS waQ CannesDaq maH. nuq wIta'? much wItIv'a'? vIpay'a'?

tlhaQ much 'e' maq. maHuj 'a matlhaQbejbe'mo' jIbItchoH. nuvaqchu' 'e' vIHarchoH. mu'meywIj yajlaHbe'mo' choHlaHbe'mo' jIbelchoH.

'a lut vIqaw: Have Space Suit Will Travel ponglu'. qon Robert Heinlein. tera' maS ghoS neHqu'mo' loDHom, leng HevmeH 'ov. Qap, 'a tev wa'DIch Hevbe'. logh Hoq Sut Hev. yu'lu'taHvIS Sut mIv tuQ 'ej jangDI' mu'meyDaj'e' woD yu'wI' 'ej Dap tam.

jIHvaD mugh ghunchu'wI' 'a latlh mughwI'qoq tamlaH chenmoHwI'pu'. nagh beQDaq taj vIghajbe'bogh yIlegh. «Hol 'oH neH» jIjatlhtaH. «lut chaH tlhIngan'e'» jIjatlh. 'a tlhInganna' vIqel luneHba'. qaSchugh jImorgh'a'? wej DIch vIghaj. nav vIqI'pa' vIqI' vIneHbe' 'a mupon vay'. mulo'law'.

mu'meywIj vIqawbe'chu'. qaStaHvIS qep'a', Soj qab vISoptaH 'ej jIDoy'qu'. mInwIjmo' DIrwIjmo' DaleghlaH. ghaytan Dap lIng nujwIj, tlhIngan Hol Dajatlhchugh pagh Dajatlhbe'chugh.

2004-04-15

mem 

tlhIngan Hol jatlh nuv 'ar? pIj ghellu' 'a wISovbe'mo' roD jun jangwI'. tera' DIS wa'SanID Hutvatlh HutmaH wej jatlhchu'wI' ghaHbe' 'oqranD 'e' chID 'ej jatlh "Not many people are [fluent] . . . the number of really fluent speakers is probably under ten. The number of people who can speak somewhat or who can read easily and who keep getting better, however, is in the hundreds." («[jatlhlaHchu'be'] nuv law' . . . ghaytan wa'maH nuv law' law' chaH law' puS 'a jatlhlaH qoj laDqu'laH 'ej DubtaH vatlh puS»). tera' DIS wa'SanID Hutvatlh HutmaH jav jatlh marq 'oqranD "There are probaby 700 people, maybe more, who have been studying the language in one form or other." («ghaytan Hol HaDtaHbogh Sochvatlh nuv'e' lutu'lu' chaq chaH law' law' Sochvatlh law' puS») Dajqu' SoQvetlh. DalaDpu'be'chugh yIlaD.

qaStaHvIS chorgh DIS ghurba'pu Sochvetlh 'a tlhIngan Hol jatlhchu''a' Hoch? ghobe'. wa'Hu' tlhIngan Hol jatlhqoqwI'pu' vIqel. Hoch tlhIngan Hol jatlhwI'pu' tlhIbHa' vISov pIj 'e' vIHar. 'a tlhIngan Hol ghojlaHbej not tlhIngan Hol yejHaD muvpu'bogh vay'. muv luneHbe' ghot law'. Qatlhqu'be' tlhIngan Hol ghojmeH Qu'. wa'maH jav ben jIH murur nuv law': Hol ghojlaHbej, 'ach maw'be'mo' chaH luHaDqu'be'. qItbej tlhIngan Hol jatlhwI' DISovbe'bogh 'ej SaHchugh vISam vIneHbej. TrekTodayDaq lujatlhchu' jatlh wa'maH jav nuv 'a Daqvetlh Suchbe'law' HochHom jatlhwI'pu'. 'Iv chaH? vIngu' vIneH!

tlhIngan Hol jatlhlaHbejwI'pu' vItogh vIneH. cha'logh wa' jatlhwI' vItogh vIneHbe', vaj chaq toghmeH mem vIgher. Hoch jatlhwI'pu' vIngu'meH tlhIngan Hol jInmol Dajqu'chu'qu' chernISchugh vay', nurI' Hoch tlhIngan Hol jatlhwI'pu' 'ej tlhIngan Hol ghojqangwI'pu'.

qech chu' 'oHbe'bej mem'e'. <tlhIngan Qummem> gher qe'San. muvtaHvIS vay' laHDaj qel 'ej chov'egh. memwIjvaD laH vIchov. chovmeH qaD vI'oghnIS. chaq majIjlaH jIH qe'San je.

2004-04-14

  




        ▲  ▼     ▲      ▼         

     <> 


2004-04-13

«tlhIngan Hol jatlhchu' jupwI'» 

QonoSvam DalaDlaHchugh, ghaytan mu'meyvam DaQoypu'. vay'vaD tlhIngan Hol Dajatlh 'e' DachIDDI', jang «qar'a'? tlhIngan Hol jatlhchu' jupwI'.» 'Iv chaH jatlhchu'wI'pu'qoqvam'e'? roD jatlhchu'wI'qoq pong vISuq 'a motlh vIghovbe'.

jatlh PatBaer tlhIngan Hol vIjatlhbe' 'ach tlhIngan Hol jatlhchu'bogh nuv puS vISov. jItney lIghtaHvIS loDvam tlhIngan Hol Qoy 'ej mu'mey law' yaj, jatlh. tlhIngan Hol jatlhchu' Qelvam 'e' maq qawwI'Daj.

tlhIngan Hol jatlhbej'a' nuvpu'vam DISovbe'bogh? vISovbe'. qubHa'mo' ghu'vam vIpojchoH.

DuH vagh ghu'mey (quqlaHba'):

 tlhIngan Hol vIjatlhchu' jatlh tlhIngan Hol jatlhchu'be'bogh nuv, laHDaj chovHa'mo'
 tlhIngan Hol vIjatlhchu' jatlh tlhIngan Hol jatlhchu'be'bogh nuv, nepmo'
 tlhIngan Hol jatlhchu' jupwI' jatlh nuv, jup laH chovHa'mo'
 tlhIngan Hol jatlhchu' jupwI' jatlh nuv, nepmo'
 tlhIngan Hol jatlhchu'bogh nuv vISovbe'bogh Sov nuv law' vIqIHbogh.

qIDchugh vay', vIbuvmeH nep ghaH. nep nuv 'e' vIpumbe' 'ach Hoch DuHmey vIbuv vIneH. vaj nepmeH meqmey vInuDchoH.

tlhaQ 'e' luqellaHlaw': DawI' Craig Parker DeltaHvIS Stephen Ross, jatlh, ngotlhwI' jangmeH tlhIngan Hol jatlhchu' Parker. 'ach tlhIngan Hol jatlhbe' Parker jatlh je. nuqjatlh? wanI' vI'olmeH RossvaD jabbI'ID vIlab. jang ghaH: «Might I suggest you look up the word "irony" in a good dictionary.» wejpuH.

laH lachqangbej jatlhwI'. ruv ngormeH loDvam DIvI' Hol jatlh, jatlh. 'a jatlhbe'. chaq jatlh 'e' Har Zhang 'a vIHon. mo'vetlh lughajbe'bej tlhIngan Hol jatlhwI'pu' 'a ghaytan mIymeH lachqang.

qatlh jup vISovbe'bogh DelmeH nepqang vay'? motlh'a' qechvetlh? mIymeH vay' jup laH lach'a'? HIja'. mIymeH vay', Duy'Daj'e' 'angqang. «puq jIHtaHvIS jISuD» «qar'a'? puq jIHtaHvIS tlhoS jIHegh» «qar'a' puq jIHqu'taHvIS muSop Qa' 'a jIboghqa'!»

napHa' Hol chovmeH Qu'. qanaDaDaq pIj laH chovnIS qum, 'ej patmey, patlhmey je 'oghpu'. 'a Hol jatlhbe'chu'chugh vay', chay' chovlaH? jatlh Hol tejvam «Hol Dajatlhchu''a'» jatlhlaHbejbe' vay'.

laH chovHa'laHbej vay'. wa'logh tlhIngan jech vItuQtaHvIS mughoS puq. jatlh puq «nuqDaq 'oH puchpa''e'?» tlhIngan Hol jatlh 'ej pup QIch. jIyay'mo' puq vIbejqu' 'ej puchpa' vISIqtaHvIS jIjatlh «pa' . . .» puchpa'Daq qet puq. loDHom ghaH. be'Hom ghaHchugh vIyu'meH vItlha'bej! narghDI' loDHom vItu'be'. ghaytan mu'tlheghvetlh neH Sov loDHom, 'a mu'tlheghvetlh jatlhchu'mo', Hol'e' jatlhchu' 'e' vIHarqanglaw'. 'ej tlhIngan Hol vIjatlhqu' jIH. tlhIngan Hol laH chovHa'laHbej jatlhwI'qoq, jatlhwI'qoq jup je.

ghaytan ngeb HochHom jatlhchu'wI'pu'qoq, 'ach ngebnIS'a' Hoch?

nIteb tlhIngan Hol jatlhchoHlaHchu'be' vay' 'e' vIHar. po'choHlaH 'a jatlhchu'meH qeqnIS 'ej qeqmeH latlhpu' poQ. vaj Ogopogo (ngeng ghargh'a') rur jatlhchu'wI' vISovbe'bogh: SaHchugh wa', SaHnIS law'.

jatlhwI' ngu'meH DupwIj vIqellI'.

2004-04-12

bo logh rur nuq? 

qen rurbogh Daqmey munobqang Google 'e' vItu'mo' bo logh rurbogh Daqmey vInuD. DaHjaj tlhIHvaD vImuch.

tera' DIS wa'SanID Hutvatlh HutmaHmey nughlIj yIngu': jIHvaD Dajbe' 'ej murarbe' wIvmey. bIH Qup law' jIH Qup puS. Couplandesque 'oH 'e' maqmo' Daq, Daj. puq poHwIj'e' DeltaH Douglas Coupland 'ej lutmeyDaj rurchugh ghItlhwIj jIQuch. Coupland tIvlaw' QupwI'pu' 'a Hujchu'be'. pIj vav puq poH tIgh tIv puq. DaHjaj'e' tIgh tIvbe', 'a puq ghaHtaHvIS vav, tIghmeyvetlh tIv puq. pa' bo logh rurbogh DochHom vISImlaHbe'.

Húrra fyrir Mér!: chuchpuHngan Hol 'oHlaw' 'ej QoQ qeltaH. DIvI' Hol lo' je. QoQ, QoQ ghomey je qeltaH. qub Hol 'a not QoQ qel bo logh. Dung Daq rur Daqvam 'a bo logh rurbe'law'.

One Good Thing (wa' Doch QaQ): 'arghHa'lI'. be' yIn Del QonoSvam. loQ muHaghmoH. be' ghaH. ghaytan pab Qun qaD qelmo' marurchuq 'e' Har Google.

Popdex: QonoS Qat buv Daqvam. bo logh Qat law' Hoch QonoS Qat pIm net Sov, 'a QonoS buvbe'mo' bo logh Popdex rurbe'law'. rurbogh ngoD vISamlaHbe'.

Semantic Compositions: tagha' lugh Google. Daqvam rurbej bo logh 'ej bo logh SIgh Daqvam. Hol, pab, QIch, mu'mey je DIqel jIH SC je 'ej pIj Daqvetlh vISuch.

Globe of Blogs (QonoS yuQ): mem 'oH. DaHjaj vISuchtaHvIS bo logh vImuvmoH 'a mem 'oHbe' bo logh. chaq mu'mey yajlaHbe'mo' Google, vay' vIrarDI' tu' neH vaj mem bo logh 'e' Har.

chay'?! jInmolHomvam vItaghDI' bo logh rurbogh Daqmey law' tu'lu'law'. pay', tetlhvam vIghertaHvIS choH Google. DaH bo logh rur pagh Daq 'e maq. Dajbej. Globe of Blogs vImuvmo' choH'a'? buvqa'lI'mo' Google choH'a'? Qagh'a' Google tetlh wa'DIch SamDI'? vISovbe'chu', 'a DaH ramqu'choHpu' wIv: rurwI'qoq 'ar vImuch?

2004-04-11

tlhogh tetlh 

Saw vay' 'ej mebpu'DajvaD nobmey neHbogh ngu'. DaH Hutlogh Suchlu'pu' 'e' maq 'ej wejlogh vISuch jIH. Qatbe'law' tlhogh lop. ghorgh qaS tlhogh? 'Iv ghaH be'nal'e'? pong'eghmeH qonwI' rut <toQ tlhargh> jatlhlaw'. vIghovbe'.

Hol puS HaD toQ tlhargh. chaq Hawai'i Hol - tlhIngan Hol mu' tetlh gherlaH.

jatlhtaH:    

mughmeH jatlh: Noli me tangere. Noli me legere. Noli me videre. Noli me.

'ej mughlaw' je: Hana 'a'ohe pâ 'ili i o'u. Hana 'a'ohe heluhelu i o'u. Hana 'a'ohe nânâ i o'u. Hana 'a'ohe i o'u.

pabHa'law'  Noli me je. vItIv. Hawai'i Hol vIjatlhbe'chu'mo' pab wejDIch 'e' vISovbe'chu'.