bo logh

jav ben tlhIngan Hol ghoj ghuDaj neHchoH loD vISovbogh. vaj ghuvaD tlhIngan Hol neH jatlh loD. puqvaD DIvI' Hol jatlh SoS 'ej SoSvaD DIvI' Hol jatlh vav. ghu Dochmey mu'mey Hutlhmo' tlhIngan Hol loQ Qatlh Qu'. mu' puS yajchoH puq, 'ej tlhIngan Hol bommey bom, 'a tlhIngan Hol jatlhchoHbejbe'. DIvI' Hol jatlhQo'mo' vav moghchoH, vaj DIvI' Hol jatlhchoH vav. Do'Ha'. puq vIghajchugh tlhIngan Hol ghoj vIneH je.

tlhIngan Hol qIchbe' lutvam. <Hol QIv> jIjatlhDI' Duy' tlhIngan Hol 'e' vImaqbe'bej. Hol patlh vIqel. juHvetlhDaq tlhIngan Hol jatlh vav neH. ghaHvaD jang pagh, Holvetlhmo' jup woQ joq Suqbe' vav.

mobbe'bej vavvetlh. British ColumbiaDaq nay Tsilhqot'in (chIlqot'en) Hol jatlhbogh be'. chIlqot'en jatlhbe' loDnalDaj 'a HolDaj choq neHqu' SoS, vaj chIlqot'en jatlh puqchaj neH. reH puqvaD Sung Hol jatlh SoS 'ej rut chIlqot'en Hol jatlh SoSnI' 'e' Qoy puq. nenDI' puq chIlqot'en Hol yaj 'a not jatlh. nughchajDaq potlhbe' Holvetlh.

<QeD qo'>Daq jISaptaHvIS muchol qorDu'. be'HomvaD jIjatlh «muD DajDaq SoHpu''a'?» HIja' jang, roSI'ya'vo' muD DujDaq raQpo' ghaH. roSI'ya'vo' neH? roSI'ya'Daq lengbe''a'? ghobe'. roSI'ya'Daq boghpu' 'ej DaH qanaDa Dab. ghaHvaD roSI'ya'ngan Hol jIjatlh 'ej yay'. yajlaw' 'ach jangmeH DIvI' Hol lo'. not jIHvaD wa' roSI'ya'ngan Hol mu' lo'. jatlh 'e'mamHeyDaj roSI'ya'ngan Hol jatlhbe'choHlaw'pu'.

qo'Daj chu'Daq potlhbe'law'mo' roSI'ya Hol jatlh 'e' mev'a'?

DaHjaj Qapbogh vav lut vISam. puqbe'DajvaD Aramaic Hol neH jatlh 'ej DaH vavDajvaD Aramaic Hol jatlh. lutvetlh vIlaDtaHvIS, latlh Aramaic Hol jatlhwI'pu' QoylI' puqbe' 'e' vISovbe'.

Hol patlh, puq ghojqangghach je QultaH tejpu'. naDev De'chaj vImuch 'e' vIHech.

navDaq bo logh vIqonlaHqu' 'ach naDev'e' vIqon. meqmeywIj boSov 'ej DaHjaj meqwIj loSDIch vIlo'. tlhIngan Hol luleghtaH QonoSnganpu' vIneH. qo' 'ay' motlh mojnIS.

vIqon 'e' qaDmo' Volume 22 pa' bo logh vI'ang, vaj jang Scott (ghItlhHom Finally (tagha') yInej). ghItlhHomvetlhmo' mutu' latlhpu'. mIr vItlha' 'e' vItIv. motlh yay' tu'wI'. jatlh «tlhIngan Hol'e' lo' maw'wI'vam'e' jay'», muvaq 'ej latlh wanI'mey qelchoH. DaSam DaneHchugh vaj "bo logh" yIGoogle. qaqwI'wIj 'oH Federación Blogaláctica'e'. chaq vImughmeH blogjIjQa' jIjatlh. chaq wa' jaj Hoch vIboS 'ej 'oHDaq vIrar 'a DaHjaj Qu' pIm vIghaj. chu'wI' vItagh vIneH ...

The Elephant's Memory (nagh beQ Hol). nethack muqawmoH jIH 'oSbogh nagh beQ, @. nethack DaQujtaHvIS Du'oStaH @. nagh beQ HolvaD qab 'oS a 'ej QIch 'oS gho, 'ach Holvetlh vIlo'chugh muHIv R 'e' vIHaj.

Flammifer QonoSDaq nagh beQ Holvam vISovchoH. Duy' Quv muchbogh ghaH, 'a vISam. Daj je Flammifer QonoS. DIvI' Hol, vIran'eS Hol, chayna Hol je lo', 'ej rut SaH je 'eSper'anto Hol. ghaytan SIbI' Holvam ghov Flammifer: Sarbogh Holmey law' ghojchugh vay', tlhIngan Hol tu'. DaH chayna Dab Flammifer; De'wI' QeD HaDlaw'lI'. QonoSDaj vItIv. ghItlhHomvam yIlaD. vIran'eS Hol lo'taHvIS, DIvI' Hol mugh, ghIq latlh qechmey qelchoH. jatlh wa' jaj HuchQeD qeltaHvIS DIvI' Hol Soj mIwmey qel vIran'eS Hol.

DaH ISO 639-2 Hol ngoq ghaj tlhIngan Hol. DIvI' HolvaD "eng" "en" ghap lo'lu' 'ej DaH tlhIngan Hol 'oSmeH "tlh" wIlo'laH net chaw'. ngoq laDDI' De'wI', Hol ghov.

ngoq pat leHtaH Library of Congress 'a DaqchajDaq wej "tlh" tu'lu'.

Do'Ha' ngoqvam lo'meH mIw vISovbe'. DaqvamDaq vIlanta' 'a pIqaD DalaDmeH jIvangnISlaw'. ghItlhHommeywIj pongmeyvaD pIqaD vIlo' vIneH. mIw vISovchoHDI' vIlo'choH.

ISO/IEC 10646-2 ngoq wIloSlaw'lI'. wa'logh nulajHa'law'.

qaStaHvIS vagh DIS qechvammo' ja'chuqlaw' De'wI' po'wI'pu' 'a DaHjaj neH SaH cha' ngoq mI'mey 'e' vItlhoj.

chaq pumDI' rutlh muyajmoH vay'.

DaHjaj Daqmey Sar vIqel.


            Dung

             ----------
           /|         /|
         /   yor    /  |'em
       /    |     /    | 
     / ('aqroS) /      |
    -----------        |
   |      (qoD)|  Dop  | retlh
   |         - | - - - | 
   |           |      /
   |     /     |     /
   |           |   /
tlhop/ (bIS'ub)| /
    ----------- 
           pIrmuS
                    
            bIng

'er'In -------------------------------- me'ghan

_________________________________
....................o
.................../|\..........................qa'rI'....DIn
______________/\__________________

jIHtaHbogh naDev vISovbe'!

loS'Hu' ram jIDoy'qu'mo' jIbuDchoH ej jIjatlhchu'be'.

jIjatlh «Hurgh» 'ej jatlh loDnalwI' «Hurghbe'» (DIvI' Hol wIlo'). QubchoH loDnalwI' 'ej jatlh chaq Hurgh DaneH. Qu'vetlhvaD yapbe' wa' mu'. maDoy'qu'mo' ngoD qelbogh Hol wI'oghchoH. maQongchoHpa', mojaqmeyvam moHaqmeyvam je DI'ogh.

d-not-dark - Hurghbe'choHchugh, ghu' DatIv'a'?
not-darkguz - Hurghbe'choHchugh jIQuchbe' 'ej ghu'vetlh wIjunlaH
not-darkgzz - Hurghbe'nISchoHlaw'. vItIvbe' 'ach ghu' wIjonlaHbe'
not-dark! - DaH Hurghbe'
darkcle! - HurghchoHchugh, ghu'vetlh vItIv
mmmdark - DaH Hurgh 'ej ghu'vam vItIv

reH po QIt vem loDnalwI' 'ej jatlhtaH blargh. blargh rurbogh mu' law' jatlh vaj po Hol 'oH 'e' vImaq. DaH po Hol ghaj ghaH 'ej ram Hol vIghaj. pov.

toH! wej pov Hol wIghaj!

jatlh loDnalwI': yapbe'ba'mo' Hol Huj DaSovbogh, chu'wI' wI'oghnIS.

va. Hoghvam jIDuy'qu'qa'. qaStaHvIS ram puv 'e' ghojnISmo' ghojwI'pu'wI', qaStaHvIS ram jIpuvnIS jIQongchoHlaHpa'. jIpuvcle 'a jIDoy'gzz.

tlhIngan Hol ghItlhmeH, DIvI' Hol pIqaD, tlhIngan Hol pIqaD ghap lo'laH vay'. tlhIngan Hol leghpu'chugh vay', SIbI' ghovlaHlaw'. vaj ghaytan The Premier Language Identification Service (Hol ngu'meH Qu' wa'DIch) qawHaqDaq tlhIngan Hol tu'lu'. Hol parHa'qu'chugh vay' ghaHvaD tlhIngan Hol SovmoHba' jup.

'a vItob vIneH. chaq chaHvaD vutpa' Sut QanwI' munobpu'bogh ghunchu'wI' vI'ang. vagh t'w DeQmey bajlaw' qech.

qep'a'majDaq reH SaH bejwI'pu'. nuqonmeH Hoqra' qem. qen ghItlhHom qonta'bogh wa' vItu'. qep'a' wa'maHDIch qel. bejwI'vetlh vIqaw. nubejqu', DochHa'. Sagh 'ej nuvaqbe'. maylaw' ghItlhHomDaj tlhIngan maH!

QaghHommey lutu'lu'ba' 'ach tlhIbHa'. le'be' ghItlhHomvam. raplaw' Hoch 'ach Hoch vItu'bogh naDevvo' vIrar.

DaHjaj ngo'bogh cha' latlh vImuch. nuqelpu' Wired (rIH) . nuqelmeH jIH muqel Stephanie A. Stanley. qarbe' ghItlhHomDaj. ngoDmey choH 'ej loQ nuvpu' tlhIvmoHlaw'. meqDaj vIyaj: lutvaD ngoDmey lIS. maH nuSaHbe'

tlhIngan Hol jatlhwI' qelbogh De' vItu'DI' vIboS 'ej naDev vImuch.