bo logh

14 Avenue CarnotDaq muHIj lupwI'Hom, 'a nuqDaq jIH? lengHa' Carnot 'ej veng botlhDaq jIHlaw'. He DungDaq HuStaH wewbogh mu'mey tIn: yupma' lumaq. He DopmeyDaq rarchuq qachmey tIQ. leng Qorwaghmey. mI' wa'maH loS vIlegh 'a malja' 'oHlaw', 'ej Hurgh. latlh lojmIt retlhDaq SeHlaw tu'lu' 'ej pa' pong vIghovbogh vISam. leQ vI'uy 'ej chuS vIQoylaH ghIq ghogh vIQoy. 'a jatlhtaH ghogh, jangbogh ghot rurbe' 'ej vIyajlaHbe'. poS lojmIt vaj jI'el 'a Hurgh qoD. HurghtaHvIS letlh vItoS. choQ wejDIchDaq Madame Philippe (much chenmoHwI' SoS) juH vISam. SIbI' muchmo' mughov.

jIHvaD Daj 'ej muchmo' mughov Hoch much beq. mughovmo' loQ Huj ghu' 'a muvuvmo' Hujbej. muchmo' SubHey jImojpu'. 'ej mutlhej 'e tIvlaw' nuvpu' vIqIHbe'pu'. loQ much ghetwI'na' yIn vIyajchoH.

SONEW beq vIlIH:

Alexandre Philippe - director ghaH. chenmeH much, qechmeyDaj Del 'ej qonwI'pu' ra'. Hoghvam bItbej 'ej Sey. vIran'eS Hol, DIvI' Hol je jatlhchu' 'a rejmorgh Damo' tlhoS ghaHvaD majatlhlaHbe'.

Steve Williams - producer ghaH. chenmeH much Huch nobpu'. pagh Sov 'a jatlhtaH. ra' neH 'a Qu'mey neHbogh Delbe' vaj ra' 'e' wIyajbe'. <<nug vIta' DaneH?gt;> vIgheltaH 'ej not QIjchu' vaj mavanglaHchu'be'. tlhIngan Hol yejHaD yajbe'. HIpmey Quchmey je DItuQtaH 'e' Harlaw' vaj paHmey 'IH vItuQtaHmo' mISlaw'.

Young Kim - videographer ghaH. chenmeH much Hoqra' lo'. val ghaH 'ej nuvuvbej. ghaHmo' meb quv jIHlaw'. reH SONEW DaqDaq jIpawDI' <<vay' DapoQ?>> ghel 'ej jIHvaD qa'vIn Soj joq qemqang. Hoqra' lo'taHvIS po'law' je.

Art Thomas - assistant producer ghaH. Huch nobpu' je ghaH 'a jInmolvaD nuvpu' Sovbogh potlh law' HuchDaj potlh puS 'e' vIHar. nuv vuv 'e' Sovbej 'ej vItlhej 'e' vItIv. HaSta much chenmeH malja' muyajmoH ghaH.

Robin Rothman - publicist ghaH. HaSta much ngevmeH SONEW vum. loS Hogh ret neH vumchoHpu' 'ej yapbejbe' poHvetlh mogh Robin. tlhIbHa'law' 'a vummeH poH Hutlhpu'mo' Qapla' chavqu'laHbe'. nIbmo' pongmeymaj, Cannes reH Qov vIponglu' net wuq.

Carrie Grant, Sarah Grant je. Sarah SoS ghaH Carrie'e' 'a be'nI' chaH 'e' HarlaHqu' vay'. vIqIHDI' tlhIngan Quch tuQ chaH 'ej nIblaw'. muchvaD boQwI' ghaH Sarah'e' 'ej assistant producer ghaH Carrie'e'. be'pu'vetlh vItIvqu' 'ej mavumbe'taHvIS matlhejchuq.

Francoise Philippe - Alexandre SoS. Cannes Dabmo' ghaH, Cannes wIDabmeH juHmey mebpa'mey je Sam.

wa' juHDaq maHtaH Young, Art jIH je. veng botlhvo' Hop juHmaj 'a lupwI'mey lutu'lu' 'ej juH vItIv. mebpa'chaj muS Qanqor 'angghal je. Sumqu' yupma' 'a tlhIngan mebpa' rurqu'. pa' Delpu'DI' SIbI' jIjatlh <<vaghvatlh rep SumejnIS'a'?>> qIDwIj lutIvbe'. Hoch jaj pa'chajmo' vIng chaH 'ej 'oHmo' leng tIvHa'bej. Do'Ha'.

SaH je be'nalpu' puS 'ej rut munuQ chaH, DIb DIHutlhbogh lughajmo' chaH 'a wanI' vItIv 'e' vIwIvlaHmo' jIH, vItIv 'e' vIwIv. jIQuch motlh 'e' vImaS.

lengmaj vIDelmeH, Blogger 'ISjaH vIlIS. vaj wa'maHHu' qaSchugh wanI', wa'maHHu' jey DalaDnIS.

VancouverDaq jIHqa'taH. qaStaHvIS jajmey veb Hoqmaj vIDel 'ej nagh beQmey vImuch 'e' vIHech.

wa'Hu' qaS qep le'. jeSbe' tlhIngan Hol lujatlhbogh SuchwI', (tlhIngan Hol wIjatlh maH neH) 'a jeS nuv puS. jeSmeH chaH HurDaq maQam jIH Qanqor latlhpu' je 'ej ghomuv wIjach.

jIjach: tlhIngan Hol peghoj! Apprennez la langue des klingons! Learn to speak Klingon, ici maintenant in here right now!

jIHvaD jatlh Qanqor: bIyuD. vIran'eS Hol Dalo' 'a DIvI' Hol neH jatlh 'angghal.

'a jeS DIvI' Hol lujatlhbe'bogh nuv puS 'ej jatlhtaHvIS 'angghal jImughlI' jIH! rut DuDchoH Holmey. jIjatlh: le q français rassemble à le q klingon, mais le klingon est un peu plus dans la Hugh. (tlhIngan HolvaD q jatlhlu'DI' vIran'eS Hol q rur 'a loQ HughDaq qaS -- 'ach Hugh vImugh 'e' vIlIj).

muyajbe'ba'mo' 'IjwI'pu'wI' jI'Ij'egh 'ej QaghwIj vItu'. mu'tlheghmey QIp qontaH 'angghal: <HoHbe'qu'rupbe'bejbe'> yajbe'mo' yabwIj vImughlaHbe'.

ghel wa' loD: En lisant cette vocabulaire: je lis Suv, Sop, tlhutlh ... avez vous manqué quelque chose? (mu'tay' vIlaDlI' ... Suv, Sop, tlhutlh je lutu'lu' ... 'a vay' Danoplaw'pu').

jIjang: Oui, c'est vrai. Sur le papier nous l'ont manqué, mais il existe dans la langue. Le mot que vous cherchez c'est ngagh. (bIlugh. navDaq wInoppu', 'a ghajbej Hol. mu' Danejbogh qanob: ngagh).

ghel latlh loD: qatlh tlhIngan Hol ghoj luneH nuv?

jang 'anggal: nongmo' tlhIngan: Sop luneHDI' Sop, Suv luneHDI' Suv ...

jImughDI' jIjatlh: ils mangent quand ils veulent manger, ils se battent quand ils veulent se battre, est quand ils veulent ngagh ... (Sop luneHDI' Sop, Suv luneHDI' Suv, 'ej ngagh luneHDI' ...)

chaHvaD ngagh vImughbe' 'a luyajba'. Hagh 'IjwIpu'. jImughlaHmo' 'ej muyajlaHmo' jIbel. mujaqmoH ghu'.

qaS wanI'mey law' 'a DelmeH poH vIHutlhmo' javleS vIDelchoH.

[loQ vIlISta' 'ej vIran'eS HolwIj vImughta']